Дьокуускай куорат уонна Саха сирин улуустарын чааһынай коллекционердарын быыстапката Өксөкүлээх Өлөксөй аатынан норуоттар доҕордоһууларын дьиэтигэр бэс ыйын 4 күнүгэр буолуоҕа. Бу Сийиэс - Саха сиригэр маннык хайысхалаах улахан тэрээһиннэртэн биирдэстэрэ.
Дьокуускай олохтоохторо уонна ыалдьыттара биир сиргэ кэллиэксийэ эгэлгэтин көрөр кыахтаныахтара: мааркалартан, аккырыыккалартан, значоктартан, манньыаттартан, банкноттартан саҕалаан, сэбиэскэй кэминээҕи бэрэдимиэттэргэ, антиквариаттарга уонна эриэккэс көрүҥ кэллиэксийэлэргэ тиийэ; күннээҕи малтан-салтан саҕалаан, сэдэх бэрэдимиэттэргэ тиийэ.
Быыстапка кэмигэр хас биирдии көрөөччү бэйэтигэр эксэмпилээр ыларыгар атастаһыылаах сиэссийэлэр уонна дьаарбаҥкалар үлэлиэхтэрэ. Тэрээһин бириэмэтигэр хас биирдии киһи эспиэрдэртэн бэйэтин хайысхатыгар, кэллиэксийэлиир матырыйаалыгар сыанабыл ылыытыгар уонна быыстапка тэрийиигэ консултаассыйа ылыан сөп. Онон, бу ыытыллар сийиэс – биир интэриэстээх дьоннуун илэ алтыһыы.
Эспэнээттэри көрдөрөөччүлэр ортолоругар саха биллиилээх коллекционердара уонна Саха сирин улуустарыттан коллекционердар кулууптара баар буолуохтара. Тэрээһиҥҥэ 100-тэн тахса чааһынай коллекционер эспэнээттэрэ туруохтара. Оттон сийиэс киин миэстэтигэр Саха АССР төрүттэммитэ 100 сылыгар анаммыт быыстапка туруоҕа. Манна Саха сирин ааспыт сыллардааҕы үбүлүөйүнэй сылларыгар анаммыт кэллиэксийэлэртэн өйдөбүнньүк бэрэдимиэттэр уонна араас тиэмэҕэ эспэнээттэр баар буолуохтара. Маны сэргэ, кэлбит дьон эрдэ ханна даҕаны турбатах раритетнай, ураты маллары манна көрүөхтэрэ.
Бу сүлүөт сүрүн соруга - дойду устуоруйатыгар уонна үгэстэригэр ытыктабыллаах, харыстабыллаах сыһыаны, дойдуга бэриниилээх буолууну сайыннарыы уонна аныгы Арассыыйаҕа араас көрүҥ кэллиэксийэни хомуйууну дьоҥҥо-сэргэҕэ киэҥник тарҕатыы, билиһиннэрии.
«Саха сирин коллекционердарын сийиэһэ – биллиилээх кэллиэксийэни хомуйааччыларга, саҕалааччы коллекционердарга уонна дьон киэҥ араҥатыгар анаммыт улахан бырайыак. Ааспыт икки сылга «оффлайн» форматтаах тэрээһиммитин көтүтэргэ күһэллибиппит, ол эрээри, биһиги «онлайн» ыыппыппыт. Кэллиэксийэни хомуйуу – бастатан туран, илиинэн тыытыы, илэ хараххынан көрүү, табыллар буоллаҕына, бэл, сыттыахха да, амсайыахха да сөп. Онон, илэ алтыһыыны виртуальнай эйгэҕэ ыытыллыбыт тэрээһининэн солбуйуу уустук. Ол эрээри, бу кэм устатын тухары коллекционердарга интэриэһинэй мал-сал эбилиннэ.
Бу сыл биһиги сийиэспитин аан маҥнайгытын, доҕордоһор, хаста даҕаны быыстапкалары ыыппыт тэрилтэбитигэр, Өксөкүлээх Өлөксөй аатынан норуоттар доҕордоһууларын дьиэтигэр ыытабыт», - диэн «Саха сирин коллекционердара» РОО бэрэссэдээтэлэ Никифор Иванов бэлиэтиир.
Саха сирин коллекционердарын сийиэһэ – былыргы малы-салы, кэллиэксийэ матырыйаалларын кэрэхсиир Дьокуускай куорат олохтоохторун уонна ыалдьыттарын ыҥырар тэрээһин. Ураты кэллиэксийэлэри, ол быыһыгар раритеттар уонна былыргы бэрэдимиэттэри көрдөрөр быыстапка-дьаарбаҥка биир эрэ күн, ол эбэтэр бэс ыйын 4 күнүгэр, сарсыарда 10 ч. киэһэ 18 ч. диэри ыытыллыаҕа.
Сийиэһи Өксөкүлээх Өлөксөй аатынан норуоттар доҕордоһууларын дьиэтэ өйөбүллээх «Саха сирин коллекционердара» эрэгийиэннээҕи уопсастыбаннай тэрилтэ ыытар. Тэрээһиҥҥэ киирии босхо.
Тэрээһин уонна кыттыы туһунан бу төлөпүөннэртэн билсиэххитин сөп: 89142810408, 89142703177, маны таһынан, Вконтакте ситим бөлөҕүн киирэн көрүҥ: https://vk.com/collectorsofyakutia.
