Саха сиригэр «Куттала суох хаачыстыбалаах суоллар» («Безопасные качественные дороги») бырайыак чэрчитинэн, эрэгийиэммитигэр аан маҥнайгытын, ирбэт тоҥ усулуобуйатыгар тутуллубут түөрт ыллыктаах суол баар буолла. Сыырдаахтан Мархаҕа диэри 2023 сылга түмүктэниэхтээх «Нам» суолун оҥорууну болдьоҕун иннинэ бүтэрдилэр. Бу туһунан өрөспүүбүлүкэ Ил Дарханын уонна Бырабыыталыстыбатын пресс-сулууспата иһитиннэрэр.
«Бу Дьокуускай куораппытыгар тырааныспар суолун биир сүрүн түмүгүнэн буолар, манна саха төрүт бырааһынньыга Ыһыах ыытыллар сирэ Үс Хатыҥ баар, маны таһынан, манна Жатай, Килдэм Хаҥалас уонна сайдан иһэр Сатал оройуонун түмүк суоллара бааллар. Федеральнай бюджет өйөбүлүн көмөтүнэн уонна суолу оҥорооччулар үтүө үлэлэрин түмүгүнэн, бу суол учаастагын оҥоруу болдьоҕун иннинэ бүттэ. Саха сиригэр ааспыт сылларга 500 км муниципальнай, эрэгийиэннээҕи, федеральнай суоллар тутуллаллар – бу дойдубут бэрэсидьиэнэ көҕүлээбит «Куттала суох хаачыстыбалаах суоллар» национальнай бырайыага көдьүүстээхтик дьайарын көрдөрөр», - диэн өрөспүүбүлүкэ Ил Дархана Айсен Николаев бэлиэтээн этэр.
Уларыта оҥоруу түмүгэр, икки ыллыктаах массыына суолун араарар сурааһыннаах, 4 ыллыктаах гына кэҥэтэн биэрдилэр. Онон, саҥа «Нам» суола иккис техническай таһымҥа эппиэттэһэр Саха сиригэр бастакы массыына суолунан буолла. Манна айанныыр учаастагын кэтитин кээмэйэ 14,5 м. буолар.
Массыына суолун уларыта тутуу үлэтигэр суол тас бүрүөһүнүн эрэ уларыппатылар, ол курдук, светофордары, тротуардары оҥордулар, суол бэлиэлэрин эптилэр, мэһэйдиир хаххалары, тас сырдатыыны, ууну сүүрдүүнү туруортаатылар уонна оҥортоотулар. Суолга «Жатай» куорат уокуругар киирээһиҥҥэ эргиирдээх быһа охсуһуулаах гынан биэрбиттэр.
«Нам» саҥа суолун арыйыыга Суол Федеральнай эгиэнистибэтин («Росавтодор») салайааччыта Игорь Костюченко кыттыыны ылла. Кини суолу оҥорооччуларга национальнай бырайыагы олоххо киллэрбиттэрин уонна суол ситимин сөбүгэр туруктаах буоларын гына көрө-истэ сылдьыбыттарын иһин махтал тылларын эттэ. Маня сэргэ, өрөспүүбүлүкэбит уонна дойдубут тупсарын, чэчириирин туһугар саҥа ситиһиилэри баҕарда.
