Тырааныспар уонна суол хаһаайыстыбатын министиэристибэтин коллегиятыгар Сунтаар Кэппэндээйи сэлиэнньэтиттэн Өлүөхүмэ куоракка диэри барар суолу Саха сирин бас билиитигэр ылан сабыллыбат оҥорорго быһаардылар.
Бу суолу Иркутскай уобалаһын Усть-Кут оройуонуттан таас чоҕу тиэйэргэ кыһын эрэ туһаналлар этэ, онон муниципальнай тэриллиилэр көрө-харайа сылдьыбыттара. Суол уһуна 270 км, итинтэн 170 км - Өлүөхүмэ, 100 км – Сунтаар улуустарынан ааһар.
Миниистир Владимир Сивцев иһитиннэрбитинэн, министиэристибэ улуус дьаһалталарын уонна «Управление автомобильных дорог, «Дороги Арктики» тэрилтэлэр бэрэстэбиитэллэрин кытта бииргэ сылдьан көрбүттэр. Кини этэринэн, суолу өрөспүүбүлүкэ бас билиитигэр биэрдэхтэринэ, сабыллыбат оҥоруохтара. Бу Саха сирин арҕаа өттүн уонна Бүлүү бөлөх экэниэмикэтин уонна сайыннарыыга төһүү буолуоҕа.
«Сунтаар улууһунан «Бүлүү» федеральнай суол ааһар эрээри, күһүн-саас сабыллан харгыстары үөскэтэр. Ас-үөл, табаар барыта Дьокуускайтан кэлэр. Таас чоҕу Усть-Куттан өрүһүнэн эмиэ киин куоратынан эргитэн, онтон алларанан тиэйэн илдьэллэр. Ол эбэтэр, барыта холбоон 3 тыһ. км. айанныыр. «Өлүөхүмэ-Сунтаар» суол оҥоһулуннаҕына, айан уһуна икки төгүл кыччыыр, ол курдук тиэллэр сыаната эмиэ. Маны таһынан, Кэппэндээйиттэн таас чоҕу Өлүөхүмэҕэ тиэйэр кыах үөскүүр», - диэн Владимир Сивцев быһаарда.
Сонун төрдө: СӨ Бырабыыталыстыбатын уонна Ил Дарханын пресс-сулууспата
