Олунньу 17-18 күннэригэр Дьокуускай куоракка СӨ Үөрэҕин уонна билимин министиэристибэтин, “Ийэ тыл кэскилэ”, “Күөрэгэй”, Олоҥхо Ассоциацията, “Ааҕар Саха сирэ” уопсастыбаннай тэрилтэлэр, Н.К. уонна А.Г. Чирээйэптэр ааттарынан Дьокуускай куорат национальнай гимназиятын сомоҕо күүстэринэн Өрөспүүбүлүкэтээҕи Төрөппүт сугулаана буолар.
Сылга биирдэ ыытыллар улахан тэрээһиҥҥэ улуус, киин куорат оскуолаларын, уһуйааннарын төрөппүттэрин кэмитиэттэрэ, ийэ, аҕа, эбэ, эһэ түмсүүлэрин дэлэгээттэрэ, улуус уонна куорат үөрэҕин салалталарын иитии хайысхатыгар исписэлиистэрэ, улуус, киин куорат уһуйааннарын, оскуолалар салайааччылара, солбуйааччылара, өрөспүүбүлүкэ, улуус, нэһилиэк уопсастыбаннай хамсааһыннара кыттыахтара.
Сугулаан Оҕо дыбарыаһын аактабай саалатыгар олунньу 17 күнүгэр сарсыарда 10.00 чааска “Ийэ тылынан иитии – оҕо сайдар тирэҕэ” диэн ааттаах сүрүн мунньахтан саҕаланар. Салгыы күнүс 14.00 чаастан Н.К. уонна А.Г. Чирээйэптэр ааттарынан Дьокуускай куорат национальнай гимназиятыгар төрөппүт бырайыагын дьаарбаҥката, кэпсэтии түһүлгэлэрэ, маастар-кылаастар, төгүрүк остуол, түмүк мунньах ыытыллыахтара.
Сугулаан төрөппүттэри, төрөппүт кэмитиэттэрин, түмсүүлэрин уһуйаан, кылаас, оскуола олоҕор саха эйгэтин кэҥэтиигэ, сахалыы иитии-үөрэтии ньыматын сатабыллаахтык туһаныыга, саха саҥатын тупсарыыга көҕүлүүр соруктаах. Бу Саха тылын, литературатын уонна култууратын учууталларын II сийиэһин быһаарыытын биир сүрүн хайысхата буолар.
Саха оҕотун, ыччатын дьоллоох кэскилин саныыр бар дьоммутун сугулааҥҥа көхтөөхтүк кыттаргытыгар ыҥырабыт.
Билсэр нүөмэр: +79142222569, +79644217932
Бэйэ кэр.
