“Саханефтегазсбыт” АУо генеральнай дириэктэрэ, Ил Түмэн Судаарыстыбаннай мунньахха “Биир ньыгыл Арассыыйа” фракция чилиэнэ, көҥүл тустууга аан дойду хас да төгүллээх чөмпүйүөнэ Виктор Лебедев “Биир ньыгыл Арассыыйа” баартыйа барыллаан куоластааһыныгар кыттарга докумуоннарын туттарда.
Виктор Лебедев бэлиэтээбитинэн, “Биир ньыгыл Арассыыйа” баартыйа барыллаан куоластааһына хандьыдааттар төһө бигэ тирэхтээхтэрин тургутар.
– Претенденнэргэ – саҥа саҕалыыр эбэтэр уопуттаах бэлиитик буол – барыларыгар биир ирдэбил турар: куоластааһын испииһэгэр быыбардааччылар өйөөбүт хандьыдааттара эрэ киирэр. Барыллаан куоластааһыҥҥа баартыйа гражданнары кытта сүбэлэһэн үлэлиир, ол түмүгэр дьиҥ чахчы кыахтаах, таһымнаах хандьыдааттары Ил Түмэҥҥэ дьокутаат быһыытынан таларга кыах үөскүүр. Биллэрин курдук, дьокутаат буолуон баҕалаах аҕыйаҕа суох, – диэн Виктор Николаевич этэр.
Виктор Лебедев Таатта – Томпо быыбардыыр уокуругуттан иккиһин турар. Төрөөбүт-үөскээбит, улааппыт Томпотун уонна сэргэстэһэ турар Таатта улууһун олоҕун-дьаһаҕын үчүгэйдик билэрэ туруоруммут соруктарын ситиһэргэ көмөлөөх буоларыгар бигэ эрэллээх.
– Таатта уонна Томпо улуустарын үгүс олохтооҕун сирэй көрсөн билэбин. Бу улуустарга буола турар быһыыны-майгыны өрүү көрө-билэ олоробун.
Дьон-сэргэ кыһалҕатын быһаарарга көмөлөһөр, маны таһынан кинилэр баҕа санааларын, оруннаах этиилэрин истэр туһугар быыбардааччыларбын кытта салгыы ыкса сибээстээх үлэлиибин, – диэн Виктор Николаевич тоһоҕолоон этэр.
Яна БАЙГОЖАЕВА.
