СӨ норуодунай дьокутаата Виктор Николаевич Лебедев быһаччы көҕүлээһининэн уонна өйөбүлүнэн Таатта улууһугар быйыл оскуоланы бүтэрээччилэр СКЭ туттаралларыгар Саха сирин бастыҥ үрдүк үөрэҕин кыһатын преподавателлэрэ үөрэх ыыттылар.
Сааскы сынньалаҥ кэмигэр Таатта улууһун араас нэһилиэгиттэн 100-чэкэ выпускник мустан, үс күн устата М.К. Аммосов аатынан ХИФУ уопуттаах преподавателлэриттэн нуучча тылын, математика, физика уонна обществознание биридимиэттэригэр босхо консултаассыйа ыллылар.
Ытык Күөл сэлиэнньэтигэр ХИФУ педагогическай десанын састааба: филологическай факультет эрэкэлээмэ уонна уопсастыбаннаһы кытта сибээс хаапыдыратын аҕа преподавателэ Надежда Петровна Артамонова, физика-тиэхиньикэ институтун уопсай уонна эспэримиэнниир физика хаапыдыратын лабаратыарыйатын сэбиэдиссэйэ Надежда Анатольевна Леонтьева, физика-тиэхиньикэ институтун физика матырыйаалларын уонна сыбаарка технологиятын хаапыдыратын аҕа преподавателэ Дмитрий Алексеевич Красильников уонна устуоруйа факультетын устуоруйа, обществознание уонна политология хаапыдыратын аҕа преподавателэ Лена Егоровна Титова тиийэн оҕолору үөрэттилэр.
Сынньалаҥ кэмэ буоларын аахсыбакка туран, үөрэнээччилэр талан ылбыт биридимиэттэригэр сарсыарда 9 чаастан киэһэ 6 чааска диэри бэркэ сэҥээрэн үөрэннилэр. Күүстээх дьарык чэрчитинэн преподавателлэр тургутук ыыттылар, уустук садаачалары, сорудахтары ырыттылар, маны таһынан СКЭ араас сорудаҕын суоттуур ньымаларын уонна алгоритмнарын үөрэттилэр.
– Бэйэм тыа сирин оскуолатыгар үөрэммитим уонна ыраах нэһилиэктэр оҕолоро СКЭ-ни туттарарга ыарырҕаталларын эппинэн-хааммынан билэбин, – диэн Виктор Лебедев эттэ. Эспиэрдэр улуус киинигэр тиийэн үөрэтэллэрэ быдан табыгастааҕын, тыа оҕото барыта Дьокуускайга баран үрдүк үөрэх кыһаларын бастыҥ преподавателлэригэр кыайан үөрэнэр кыахтара суоҕун бэлиэтээтэ. Кини сааскы сынньалаҥ кэмигэр үрдүк кылаас үөрэнээччилэригэр эбии үөрэҕи ыытарга тэрээһин өттүгэр көмөлөспүттэрин иһин Таатта улууһун үөрэххэ управлениетыгар уонна олохтоох дьаһалтатыгар махталын биллэрдэ: – Үөрэнээччилэр элбэх билиини ылбыттара, ол билиилэрэ СКЭ-ни ситиһиилээхтик туттаралларыгар, баҕарбыт үөрэхтэригэр киирэллэригэр көмөлөһүөҕэ диэн эрэнэбин, – диэн норуот дьокутаата санаатан эттэ.
Яна БАЙГОЖАЕВА.
