“Саханефтегазсбыт” аахсыйалаах уопсастыба 2027 сылга диэри бары филиалларын ньиэп бородууктатын ааҕар-учуоттуур мобильнай тэриллэринэн (МУКУН) хааччыйарга былаанныыр.
“Саханефтегазсбыт” аахсыйалаах уопсастыба генеральнай дириэктэрэ, СӨ норуодунай дьокутаата Виктор Лебедев иһитиннэрбитинэн, ньиэп бородууктатын ыйааһынын (маассатын) ааҕарга-суоттуурга киһи сабыдыалын олоччу туоратар уонна уматык-оҕунуох матырыйаалларын (ГСМ) бас билээччилэр, таһааччылар икки ардыларыгар үөскүөн сөптөөх мөккүөрдээх түгэни аччатар туһугар маннык быһаарыыны 2021 сыллаахха ылыммыт. Маны таһынан, мээрэйдээһин аныгы ньымаларын киллэрии ньиэби уу устун тиэйэн аҕалбыт суудуналартан нефтебаза резервуарыгар быһаччы динамическай ньыманан сүөкүүр кыаҕы биэриэҕэ.
“Ньиэп бородууктатын тиэрдии уустук логистикатын учуоттаан туран, МУКУН уопсастыба үлэтигэр-хамнаһыгар үчүгэй өттүнэн сабыдыаллыаҕа, онтон автоматизация үлэ хаамыыта аһаҕастык көстөрүн хааччыйыаҕа”, – диэн генеральнай дириэктэр этэр. МУКУН, манна туттуллар тэриллэр (комплектующайдар) 100 % Арассыыйаҕа оҥоһуллубуттара эмиэ кырата суох суолталаах. Ол курдук, кээмэйдиир комплекстар сииги, ороскуоту, сабардамы мээрэйдиир тэриллээхтэр, онтон да атын наадалаах датчиктардаахтар. Балар ньиэп бородуукталарын хаачыстыбатын уонна кээмэйин буола турар кэмҥэ (онлайн) кииннэммит ситимҥэ тута көрдөрөллөр, 0,25 % эрэ алҕаһыахтарын сөп. Тэҥнээн көрүөх: ньиэп бородууктатын ыйааһынын уруккулуу сабардам-маасса ньыматынан быһаардахха 0,5 % алҕаһыыр. Холобур, 3 000 туонна ньиэп бородууктатын сабардам-маасса ньыматынан ыйаатахха (алҕаһы түһэриитэ – 0,5 % буоларын учуоттаатахха), 15 туонна буолар. Онтон МУКУН көмөтүнэн ыйаатахха, алҕаһы түһэриитэ 0,25 % буоллаҕына, 7,5 туоннаҕа тэҥнэһэр. Аҥаардас бэнсиин биирсэтээҕи сыанатынан аахтахха, 450 000 солк. сууманы сүтэрэбит. Онно тырааныспар ороскуотун эптэххэ, 600 000 солк. тэҥнэһэр.
2022 сыллаахха бэйэбит дойдубутугар оҥоһуллубут саҥа кээмэйдиир прибордары хампаанньа маннык филиалларыгар: Ньурбатааҕы уонна Аллараа Халыматааҕы ньиэп базаларыгар – туруорбуттара. 2023 сылга саҥа комплекстар Дьокуускайдааҕы, Хаандыгатааҕы уонна Аллараа Бэстээх ньиэп базаларыгар атыыласпыттара, туруорбуттара. Бэрэбиэркэни ааһаннар номнуо үлэҕэ киирдилэр. 2024 сылга ботуччу сыаналаах, үрдүк технологиялаах кээмэйдиир прибордарынан Өлүөхүмэтээҕи уонна Сангаардааҕы ньиэп базалара хааччыллыахтара.
“Мобильнай уонна стационарнай кээмэйдиир прибордартан киирэр дааннайдары, маны таһынан ньиэп хаачыстыбатын көрдөрүүтүн, ахсаанын мээрэйин Дьокуускай куоракка баар киин офиска толору тиэрдэр туһугар Уопсастыба кээмэйдиир комплекстарын (уопсайа 12 устуука баар) биир кэлимсэ хонтуруоллуур кииҥҥэ түмэр гына үлэни ыытабыт”, – диэн “Саханефтегазсбыт” аахсыйалаах уопсастыба сүрүн инженерэ Александр Нифонтов кэпсээтэ. Кини бэлиэтээн эппитинэн, дааннайдары барытын бииргэ табыгастаахтык түмэн көрдөрөр хонтуруол түмүгүнэн исписэлиистэр ньиэп бородууктатын тутууну буола турар кэмҥэ кэтээн көрөр уонна үлэ хаамыытын суһаллык салайар буолуохтара. Бу түмүгэр үлэни миэстэтигэр хонтуруоллуур, ханнык баҕарар көрүҥ отчуоту оҥорор уонна түмүгү төһө кыалларынан көдьүүстээхтик ырытар кыахтаныахтара.
