«Полярные авиалинии» АК СӨ Үөрэх министиэристибэтин кытта 2023 сылга Омскайдааҕы летнай-техническэй колледжка бүддьүөт миэстэтигэр тус сыаллаах үөрэҕи арыйар. Идэтийии хайысхата: көтөр аппараттары туһаныы («Ми-8» пилота). Үөрэххэ Саха сирин оскуолаларын бүтэрээччилэр эрэ туттарсаллар. Үөрэтии болдьоҕо – 2 сыл 10 ый.
Тус сыаллаах үөрэххэ дуогабар түһэрсибит дьоҥҥо «Полярные авиалинии» АК Дьокуускайга физкультураҕа тургутууну тэрийэр; Дьокуускайтан Омскайга хампаанньа маршрутунан баран кэлэр ороскуоту уйунар; мэдиссиинискэй хамыыһыйаны ситиһиилээхтик ааспыттарга ороскуотун төлүүр (13 000 солкуобай). Ону таһынан үөрэххэ киирбиттэргэ сылга биирдэ олорор сирдэригэр барар уонна үөрэхтэригэр төннөр айаннара төлөнөр; ситиһиилээхтик үөрэнэр курсаннарга истипиэндьийэ (7000 солк. тиийэ) ананар; бүтэрээччилэри үлэнэн хааччыйаллар.
Санатар буоллахха, «Полярные авиалинии» хампаанньа каадырдары бэлэмниир үлэни 2009 сылтан ыытар. Тус сыаллаах бырагыраама 2019 сыллаахха авиа хампаанньа көҕүлээбит уонна Ил Дархан Айсен Николаев өйөөбүт «Ыччаты авиацияҕа» өрөспүүбүлүкэтээҕи бырайыак чэрчитинэн хаттаан сөргүтүллэн олоххо киирбитэ.
Тус сыаллаах үөрэх туһунан сиһилии манна ааҕыҥ https://polar.aero/press-tsentr/news/3143/
