Иркутскай уобалаһыгар ниэп тохтуута тахсыбытынан, Бырабыыталыстыба бэрэссэдээтэлин бастакы солбуйааччыта Дмитрий Садовников бэс ыйын 13 күнүнээҕи ыксаллаах быһыы-майгы кэмитиэтин мунньаҕар Өлүөнэҕэ ниэп тохтуутун быыстала суох көрөр мониторинг тэрийэргэ сорудах биэрдэ.
Салайар уорганнар уонна ыксаллаах быһыы-майгы сулууспата «Муҥутуур бэлэм» режимигэр киирдилэр. Ленскэйгэ быыһыыр сулууспа 9 үлэһитэ ниэп тохтуутун суох гынарга анал тэриллээх бэлэм олороллор. Кинилэргэ 2 устар аал, 350 кг сорбент, 300 м боновай күрүө бэрилиннэ.
Судаарыстыбаннай экология кэтэбилин Ленскэйдээҕи кэмитиэтэ уу боруобатын ыларга 3 бөлөҕү бэлэмнээтэ. Гидрометсулууспа олохтоох салаата ниэптээх долгун Саха сиригэр быһа холуйан бэс ыйын 15-16 күннэригэр кэлиэ диэн быһаардылар. Иркутскай уобалас Алексеевскай бөһүөлэгиттэн Ленскэй оройуон Витим бөһүөлэгэ 415 км тэйиччи турар.
Ниэп хайдах тохтубутун санаттахха, бэс ыйын 12 күнүгэр түүн 22:40 чааска өрүскэ ыйыллыбыт нэһилиэнньэлээх пуун аттыгар «ЛОРП» ПАУо «Ерофей Хабаров» теплохода «Алексеевская РЭБ» ХЭТ «ТР-901» теплоходугар кэтиллибитэ. «ЛОРП» танкера Осетровоттан Өлүөхүмэҕэ диэри 835 туонна уматыгы тиэйэн испитэ.
Эрэдээксийэттэн: Бүгүн социальнай ситимнэринэн ниэп хайыы-үйэ Мохсоҕоллооххо тиийдэ диэн дьон суруйар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Мария Васильева, ЯСИА
