Бүлүү өрүһүнэн таһаҕас тиэллиитин бастакы түһүмэҕэ түмүктэннэ. Былаан толору туолла. Ол туһунан бэс ыйын 28 күнүгэр СӨ Нэһилиэнньэ олоҕор куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы Никита Павлов иһитиннэрдэ.
Бүгүҥҥү туругунан, сүрүн таһаҕас Өлүөнэ уонна Алдан өрүстэринэн тиэллэ турар. Халыма өрүскэ Зырянкатааҕы чохтоох сиртэн чоҕу Зеленомысскайдааҕы өрүс пуордугар тиэйэллэр. Дьааҥы уонна Индигиир өрүстэринэн сырыы саҕаланнар эрэ, ол чоҕу салгыы Арктика улуустарыгар илдьиэхтэрэ.
Бэс ыйын 28 күнүнээҕи туругунан, 2023 сыллааҕы навигация саҕаланыаҕыттан, барыта 555 тыһыынча туонна араас табаар тиэлиннэ. Ол иһигэр Саха өрөспүүбүлүкэтин нэһилиэнньэтин олоҕун уонна хаһаайыстыбаннай субъектары хааччыйарга анаммыт 328 тыһыынча туонна таһаҕас (уопсай таһаҕас 25,8 %-на). Онтон 283 тыһыынча туонната тиийиэхтээх сиригэр номнуо тиэрдиллибит. Судургутук эттэххэ, быйылгы былаан 22,3 %-на туолбут.
СӨ Нэһилиэнньэ олоҕор куттал суох буолуутун хааччыйар судаарыстыбаннай кэмитиэт пресс-сулууспата.
