От ыйын 1 күнүгэр Саха сиригэр Национальнай бэчээт күнэ бэлиэтэннэ. Бу сахалыы тыллаах бэчээт үлэһиттэригэр улахан суолталаах күн 2020 сыллаахха олунньу 13 күнүгэр Ил Дархан Айсен Николаев ыйааҕынан олохтоммута. Онтон ыла сыл көппөккө ыытылла турар.
Ити күн Бырабыыталыстыба 1 №-дээх дьиэтигэр буолбут үөрүүлээх тэрээһиҥҥэ Ил Дархан уонна бырабыыталыстыба дьаһалтатын салайааччыта Георгий Михайлов: “Национальнай бэчээт күнэ – эдэр бырааһынньык. Ол гынан баран, күн бүгүн даҕаны “бу бырааһынньык саха бэчээтин кэскилин түстүүр, төрөөбүт тыллары харыстыырга, төрөөбүт дойдуну таптыырга төһүү күүс буолар” диэн этиэххэ сөп. Ол – Национальнай бэчээт күнү сүрүн соруга”, – диэн бар дьону, бэчээт эйгэтин үлэһиттэрин эҕэрдэлээтэ, итиэннэ бастыҥ үлэлээх суруналыыстары бэлиэтээтэ.
Ол курдук, быйыл суруналыыстыка эйгэтигэр В.В. Никифоров-Күлүмнүүр аатынан судаарыстыбаннай бириэмийэни СӨ Үтүөлээх суруналыыһа, “Саха сирэ” хаһыат үлэһитэ Иван Ксенофонтов ыыла.
СӨ Ил Дарханын Н.Е. Мординов-Амма Аччыгыйын аатынан оҕо литэрэтиирэтигэр бириэмийэтин “Айар” национальнай кинигэ кыһатын сүрүннүүр эрэдээктэрэ Евдокия Иринцееваҕа-Огдоҕо туттардылар.
“Саха Өрөспүүбүлүкэтин Үтүөлээх сураналыыһа” ааты “Забота-Арчы” хаһыат бэлитиичэскэй анаарааччыта Надежда Аргуноваҕа иҥэрдилэр.
“Ситим” медиа-бөлөх үлэһиттэрэ, “Күрүлгэн” уус-уран сурунаал бас дьаһабыла Афанасий Гуриновка-Арчылаҥҥа “Саха Өрөспүүбүлүкэтин Бэчээтин туйгуна”, “Кыым” хаһыат көмпүүтэргэ таҥааччыта Евдокия Дьяковановаҕа Ил Дархан махтал суругун туттардылар.
Түгэни туһанан, биир идэлээхтэрбитигэр сыралаах үлэлэрэ сыаналаммытынан истиҥ эҕэрдэбитин тиэрдэбит!
Мария ВАСИЛЬЕВА хаартыската.
