Сунтаар сэлиэнньэтин олохтоохторо “Олорор сир уонна куорат эйгэтэ” национальнай бырайыак “Ыраас уу” федеральнай бырайыагын чэрчитинэн быйыл иһэр уунан хааччыллыахтара.
Нэһилиэнньэлээх пууҥҥа сууккаҕа 1100 куб уунан хааччыйар кыамталаах уу систиэмэтэ тутуллар.
Бырайыак быһыытынан сууккаҕа 500 куб м оҥорон таһаарар водозабор, сууккаҕа 1100 куб м уу ыраастыыр ыстаансыйа уонна уу мунньар холуонналардаах 3,5 км уу тиһигин ситимэ тутуллуохтаах. Бырайыак федеральнай уонна өрөспүүбүлүкэ үбүнэн төлөнөр.
Өрөспүүбүлүкэ ДьУоХХ уонна энэргиэтикэ миниистирэ Вячеслав Емельянов бэлиэтээбитинэн, Сунтаарга үлэ былаан быһыытынан барар. Бүгүҥҥү күҥҥэ тутуу уопсай бэлэмэ - 60 %. Ыстаансыйа кэлэр сылга хайыы үйэ үлэҕэ киириэхтээх. Онон үлэлээн бардар эрэ, Сунтаар улууһун тиһиктээхтик ыраас уунан хааччыйыа этэ.
Саха сиригэр “Ыраас уу” эрэгийиэннээҕи бырайыагынан өссө алта эбийиэк бэлэмнэнэ сылдьар: Горнайга, Хаҥаласка, Өлүөхүмэҕэ, Аммаҕа уонна Дьааҥыга.
“Ыраас уу” федеральнай бырайыак сүрүн сыала-соруга – Арассыыйа олохтоохторун биир кииннэммит ситимнээх ыраас уунан хааччыйыы. Эрдэ бу бырайыак “Экология” национальнай бырайыак чэрчитинэн үлэлиирэ, онтон 2021 сылтан “Олорор сир уонна куорат эйгэтэ” бырайыак иһигэр киирбитэ.
СӨ ДьУоХХ уонна энэргиэтикэ министиэристибэтин пресс-сулууспата.
