Бэҕэһээ Дьокуускай куорат уокуруктааҕы дьаһалтатын улахан саалатыгар Саха Өрөспүүбүлүкэтин биллиилээх судаарыстыбаннай, бэлитиичэскэй уонна уопсастыбаннай диэйэтэлэ Екатерина Никитина 75 сааһыгар аналлаах уопсастыбаннас үөрүүлээх мунньаҕа буолла.
Екатерина Семеновнаны VI ыҥырыылаах Ил Түмэн бүддьүөккэ, үпкэ-харчыга, нолуок уонна сыана бэлиитикэтигэр кэмитиэтин бэрэссэдээтэлэ Юрий Николаев эҕэрдэлээтэ. Кини Екатерина Никитина көҕүлээһининэн Саха сирин сайдыытыгар улахан суолталаах сокуоннар киирбиттэрин, оҥорбут бырайыактара чопчу, сыыһата-халтыта суох буолалларын, кини көҕүлээбит “Саха Өрөспүүбүлүкэтин киин куората Дьокуускай статуһун туһунан” сокуона күн бүгүнүгэр диэри үлэлии турарын эттэ.
Салгыы Юрий Николаев Ил Түмэн бэрэссэдээтэлэ Алексей Еремеев эҕэрдэтин аахта. Онно Екатерина Семеновна III ыҥырыылаах Ил Түмэн бэрэссэдээтэлин солбуйааччытынан үлэлии сылдьан доруобуйа харыстабылын, үөрэхтээһини сайыннарыыга, нэһилиэнньэни дьиэнэн хааччыйыыга, үлэ бэтэрээннэрин интэриэстэрин туруулаһыыга туһуламмыт бөдөҥ бырайыактары оҥорсубута, Саха сирин Өрөгөй ырыатын ылыныыга кыттыбыта бэлиэтэннэ.
Екатерина Никитина 1948 сыл от ыйын 24 күнүгэр Амма оройуонун Алтан сэлиэнньэтигэр элбэх оҕолоох колхуостаах дьиэ кэргэҥҥэ төрөөбүтэ. Ийэтэ Елена Михайловна Никитина - тыыл бэтэрээнэ, аҕата Семен Семёнович Ноев - Аҕа дойду сэриитин бэтэрээнэ этилэр. Екатерина Семеновна идэтинэн – математик, физика-математика билимин хандьыдаата.
Кини 1984 сылтан 2022 сылга диэри СГУ (СВФУ) математика уонна информатика институтун алгебра уонна геометрия хаапыдыратын сэбиэдиссэйинэн үлэлээбитэ.
1995 с. Дьокуускай к. дьокутааттарын I ыҥырыылаах мунньаҕын дьокутаатынан, 1998 сылтан бэрэссэдээтэлинэн, 2001 с. Дьокуускай к. дьокутааттарын II ыҥырыылаах мунньаҕын дьокутаатынан уонна бэрэссэдээтэлинэн талыллан таһаарыылаахтык үлэлээбитэ.
2003 с. Ил Түмэн III ыҥырыылаах мунньаҕын дьокутаатынан уонна бэрэссэдээтэлин солбуйааччытынан талыллыбыта. 2008-2012 сс. РФ Федеральнай мунньаҕын Федерациятын сэбиэтин чилиэнин көмөлөһөөччүтүнэн үлэлээбитэ. 2011 с. РФ судаарыстыбаннай гражданскай сулууспатын 2 кылаастаах сүбэһитин чыына иҥэриллибитэ. Екатерина Семёновна - элбэх бочуоттаах аат уонна улахан наҕараада хаһаайына.
Сонун төрдө: Ил Түмэн пресс-сулууспата
