Күндү ааҕааччыларбыт! «Ситим» медиа-бөлөх Сахабыт сирин уһулуччу көрдөрүүлээх дьонун, чахчыларын, тэрээһиннэрин үйэтитэр уонна норуоту түмэр соруктаах «Саха сирин рекордун кинигэтэ» олохтообутун истибиккит буолуо.
Кинигэ бастакы рекорда «Саамай элбэх киһилээх хортуосканы аһаҕас уокка ыһаарылааһын» балаҕан ыйын 17 күнүгэр Хаҥалас улууһун Булгунньахтаах сэлиэнньэтигэр олохтоммута. Рекорду олохтооһуҥҥа барыта 168 киһи кыттыбыта. Бу Сахабыт сиригэр Үлэ сыла биллэриллибитигэр ананан ыытыллыбыт тэрээһин Булгунньахтаах хортуоскатын киэҥ эйгэҕэ тарҕатыы, нэһилиэк аатын ааттатыы эрэ буолбакка, оҕуруоччуттар сыралаах үлэлэрин түмүгүн көрдөрүү, кинилэргэ сүгүрүйүү бэлиэтэ буолла! Мантан кынаттанан, салгыы иннибит диэки, саҥа рекордтарга, баран иһэбит!
Ол курдук, «Ситим» медиа-бөлөх, алтынньы 1 күнүгэр буолаары турар Аҕам саастаах дьон күнүгэр анаан, Саха сирин рекордун кинигэтигэр саҥа рекорду олохтуур «Ытык кырдьаҕас» күрэһи биллэрэр!
Күрэскэ өрөспүүбүлүкэ 90 үөһэ саастаах хайа баҕарар олохтооҕо кыттыан сөп. Кыттааччылар хаартыскаларын, биографияларын «Кыым.ру» саайка таһаараммыт киэҥ эйгэҕэ биллэрэбит. Түмүгэр Сахабыт сирин кырдьаҕастарын билиэхпит, киэн туттуохпут, Сахалар биир уһун үйэлээх омук буоларбытын көрөн итэҕэйиэхпит. Оттон күрэскэ кыайбыт саамай элбэх саастаах Ытык кырдьаҕаспыт Саха сирин рекордун кинигэтигэр уһун үйэлээх быһыытынан претендент буолуоҕа.
Усулуобуйата:
- Кыттааччы 90 үөһэ саастаах буолуохтаах
- Кыттааччыны киэҥ эйгэҕэ анаан хаартыскаҕа түһэрэҕит
- Толору аатын-суолун, төрөөбүт күнүн, толору сааһын ыйаҕыт
- Кыттааччы биографиятын суруйаҕыт
- Сайаапканы ыытааччы төлөпүөнүн нүөмэрин булгуччу ыйаҕыт
Сайаапкалары kyymgazeta@gmail.com аадырыстаах электроннай почтаҕа алтынньы 5 күнүгэр диэри тутабыт. Билсэр төлөпүөн: 8 (914) 820 09 75
Тэрийэр бөлөх.
