Бүгүн, алтынньы 27 күнүгэр, Н.Д. Неустроев аатынан SMART-бибилэтиэкэҕэ «Саха сиригэр мэтириэти саамай элбэх киһи кыттыылаах ойуулааһыҥҥа» Саха сирин саҥа рекордун олохтоотулар. Рекорду олохтооһун саха литэрэтиирэтин төрүттээбит Николай Неустроев аатын киэҥ эйгэҕэ тарҕатар уонна үйэтитэр соруктаах ыытылынна.
Бибилэтиэкэ үлэһиттэригэр Николай Неустроев мэтириэтин түөрт муннуктуу быһыылаах нүөмэрдэммит холусталарын түҥэттилэр. Кыттааччылар хартыына хайа чааһа түбэспитин билбэккэ туран нүөмэрдэринэн кырааскалаатылар. Кинилэр холусталар бары холбоспуттарын кэннэ биирдэ мэтириэт хайдаҕын көрдүлэр. «Саха сирин рекордун кинигэтин» эспиэрэ Егор Степанов мэтириэти 116 киһи хомуйбутун бигэргэттэ. Кини салайааччыга рекорд олохтоммутун туһунан сэртипикээт туттарда.
Дьокуускай к. кииннэммит бибилэтиэкэлээх ситимин дириэктэрэ Нюргуяна Решетникова иһитиннэрбитинэн, мэтириэт кэтитэ - 2 миэтэрэ, үрдүгэ - 2 миэтэрэ буолбут. Эскииһи бибилэтиэкэ үлэһитэ, худуоһунньук Күннэй Борисова оҥорбут. Николай Неустроев мэтириэтэ бибилэтиэкэ 2 этээһигэр киниэхэ анаан тэриллибит муннукка сүрүн киэргэл уонна бибилэтиэкэрдэр мииссийэлэрин бэлиэтэ буолуоҕа.
Саха сирин рекордун регистратора «Ситим-Медиа» тэрилтэ бэрэстэбиитэлэ инники «Кыым» хаһыаты кытта Арассыыйа уонна Аан дойду таһымнаах рекордтары олохтообуттарын бэлиэтиибит. Оттон быйыл Мария Христофорова көҕүлээһининэн, Саха сирин нэһилиэнньэлээх пууннарын, тэрилтэлэрин, олохтоохторун ураты өрүттэрин, ситиһиилэрин арыйар соруктаах «Саха сирин рекордун кинигэтэ» бырайыак олоххо киирдэ. Бырайыак аан бастакы рекорда бу сыл балаҕан ыйын 17 күнүгэр Хаҥалас улууһун Булгунньахтаах сэлиэнньэтигэр аһаҕас уокка хортуосканы саамай элбэх киһи кыттыылаах ыһаарылааһыҥҥа олохтоммута. Онно барыта 168 киһи кыттыбыта.
Бэйэ кэр.
