Киин куорат баһылыга Евгений Григорьев муниципальнай тиэргэн хомуйааччылары куорат иһигэр уонна таһыгар уопсастыбаннай тырааныспарынан босхо айанныылларын хааччыйарга соруйда.
«Пассажирдары тиэйиини тэрийээччи» МХТ салайааччыта Эдуард Садовников иһитиннэрбитинэн, бу миэрэни уокуруктар управаларыгар уонна куорат таһынааҕы дьаһалталарга үлэлиир оробуочайдары өйүүр сыалтан киллэрдилэр.
«Билигин испииһэккэ 106 үлэһит аата баар. Дааннайдарын «Алмазэргиэнбаан» тэрилтэҕэ биэриэхпит. Оччоҕо кинилэргэ куорат иһигэр уонна таһыгар оптуобуһунан босхо айанныыр «Саха сирин олохтооҕун каартатын» оҥорон биэриэхтэрэ», - диэн кини быһаарда.
Киин куоракка тиэргэни хомуйууга аутсорсинг ньымата барсыбата көстүбүтэ. Онон, 2021 сылга салалта муниципальнай тиэргэн хомуйааччы хамнаһын уонна статуһун үрдэтэр туһугар маннык штаты сөргүтэргэ быһаарбыта. Ону кытары кинилэр үлэлэригэр ирдэбил эмиэ үрдээбитэ. Биллэн турар, штакка киирбит оробуочай хамнаһа аутсорсинг киэниттэн төһө эмэ үрдүк уонна социальнай бакыаттаах.
Сонун төрдө: Дьокуускай к. уокуруктааҕы дьаһалтата
