Бэҕэһээ, муус устар 30 күнүгэр Дьокуускай к. баһылыга Евгений Григорьев, уокуруктарынан сылдьан, ууга барбыт хас да элбэх кыбартыыралаах дьиэ олохтоохторун кытта кэпсэттэ.
Баһылык этэринэн, ууну тохтоло суох мотопомпанан уонна массыыналарынан оботтороллор. Ону кини: «Ааспыт күннэргэ тэҥнээтэххэ, сорох дьиэлэргэ балаһыанньа тубуста, ууттан бохсолоннулар. Оттон сорохторго, аттынааҕы сирдэр ирэннэр, уу подъездтарыгар син-биир киирэ турар», - диэн быһаарда.
Хайа эрэ дьиэ олохтоохторо, ааспыт сылга суолу оҥоруу түмүгэр уулусса уутун сүүрдэр ханаабалары уонна турбалары суох гыммыттарыттан, быйыл уу барыта кинилэргэ киирэ турарын баһылыкка эппиттэр. Бэҕэһээҥҥи туругунан, киин куоракка барыта 30 элбэх кыбартыыралаах саахалланар туруктаах уонна хаарбах дьиэҕэ уулусса уута киирбит.
Эрэдээксийэттэн:
Чааһынай дьиэлээх түөлбэлэргэ эмиэ ыксаллаах быһыы-майгы үөскээбитин суруйаллар. Холобура, 113 кыбаартал дьоно дьиэлэриттэн кыайан тахсыбакка олороллор үһү.
Сонун төрдө: Дьокуускай к. уокуруктааҕы дьаһалтатын пресс-сулууспата
