“Бүлүү” А-331 федеральнай тыраасса 572 км – 578 км учаастагар (Бүлүүөрүһүнэн ааһар суол) хапытаалынай өрөмүөн түмүктэннэ. Хапытаалынай өрөмүөн кэмигэр федеральнай суолу оҥорооччулар 6,269 км уһуннаах суол учаастагын IV тэхиниичэскэй түһүмэх ирдэбилигэр эппиэттиир. Аспаалынан бүрүйдүлэр, икки балаһалаах буолла, биир балаһа кэтитэ – 3 м өрөмүөнү бэдэрээттиир тэрилтэ –“РИК Автодор” АУо – оҥордо.
Бу суол учаастага федеральнай бас билиигэ 2020 с. киирбитэ, туруга мөлтөҕө, ирдэбилгэ кыайан эппиэттээбэтэ. Билигин суол нуормаҕа сөп түбэһэр, аныгы ыстаандаарка толору эппиэттиир кыахтанна. Аспаалынан бүрүллүбүт суолунан суоппардар да, сатыы дьон да куорат административнай, социальнай тэрилтэлэригэр табыгастаахтык айанныыллар, Бүлүү улууһун киинигэр тырааныспар сырыыта биллэ тубуста.
Суолу куттала суох буолууга эппиэттиир тэриллэринэн хааччыйдылар. Ол курдук, 5,4 км уһуннаах сиргэ сырдатар уоту-күөһү тартылар, 44 устуука светофору туруордулар, 5,1 км уһуннаах тротуар, 1300 м уһуннаах тутуһардаах хахха, 5 оптуобус тохтоло, сатыы дьон суолу туоруур анал сирэ баар буолла. Маны таһынан массыына турар, тохтуур сирэ үксээтэ. Саҥа суол бэлиэлэрин, хаххалары туруордулар.
“Бүлүү” Упрдор ФКУ начаалынньыга Николай Андреев бэдэрээттиир тэрилтэ үлэһиттэригэр, ону сэргэ “Бүлүү улууһа (оройуона)” МТ, “Якутскэнерго” ПАО, “СӨ ДьУоХХ” ГУП, “Сахатранснефтегаз” АУо, “Ростелеком” ПАО “Сахателеком” филиал салалталарыгар, кэлэктииптэригэр бииргэ үлэлэспиттэрин иһин махтанна. Бииргэ үлэлэһии түмүгэр болдьоммут кэмҥэ коммуникацияны толору тардыбыттар: гаас, ититии ситимнэрин, уот-күөс лииньийэлэрин, сибээһи уонна ВОЛС.
Федеральнай суол ааҕыныстыбата бигэргэппит “Бүлүү” А-331 федеральнай суол сайдыытын бырагырааматыгар сөп түбэһиннэрэн, бастатан туран, тыраасса учаастактарын нуормаҕа эппиэттиир гына оҥороллор. Бу тыраасса учаастактара нэһилиэнньэлээх пууннары кытта кыраныыссалаһаллар. Бүгүҥҥү туругунан Саха сиригэр “Бүлүү” А-331 тыраассаҕа уопсайа 600-тэн тахса км уһуннаах суол аспаалынан бүрүлүннэ.
