Автомобильнай уонна куорат олохтоохторун тиэйэр тырааныспар үлэһитин күнүн чэрчитинэн, идэ сатабылын тургутар күрэс кыайыылаахтарын: Дьокуускай куоракка 2023 сылга «Оптуобус маршрутун бастыҥ суоппарын» уонна «Куорат олохтоохторун тиэйэр бастыҥ маршруту» быһаардылар.
Ол түмүгүнэн бастыҥ суоппарынан Денис Дроздов ааттанна. Бастыҥ маршрутунан «Сервис Авто» ХЭТ (дириэктэр Семен Иванов) 17 №-дээх маршрута буолла.
Күрэскэ барыта 10 суоппар кытынна. Кинилэр суол быраабылатын билиигэ, оптуобуһу сатабыллаахтык ыытыыга күрэстэстилэр. Маны сэргэ, дьүүл сүбэтэ оптуобус туругун сыаналаата. Бастыҥ маршруту талыыга олохтоохтортон үҥсүү, ол-бу быһылаан уонна графигы кэһии суоҕун учуоттаатылар.
Кыайыылаахтарга киин куорат баһылыга Евгения Григорьевтан харчынан бириис туттардылар. Күрэс суоппардары көҕүлүүр уонна уопсастыбаннай тырааныспар үлэтин тупсарар соруктаах.
Сонун төрдө: Дьокуускай куорат уокуруктааҕы дьаһалтата
