Бүгүн биһиэхэ анал байыаннай дьайыыларга уолаттарын сүтэрбит дьон эрийдилэр. Кинилэр өрөспүүбүлүкэ военкоматыгар көмө көрдүү тиийэн баран, сабыылаах ааҥҥа, тугу да билбэт дьоҥҥо кэтиллибиттэр. Таас нөҥүө олорон кэпсэтэр дьуһуурунай вахтертан туох да атына суох эбит. Кумааҕы баар буоллаҕына, ону ылан хаалар эбэтэр биир эмэ үлэһит нүөмэрин биэрэн абырыыр.
Ол нүөмэринэн өлбүт уонна сүппүт байыастарынан дьарыктанар ааттаах военкомат үлэһитэ кэпсэтэр даҕаны, бэйэтэ туох да баазата суох, байыастар дааннайдарын эрийбит киһиттэн ыйытан билэр, тугу да эрэннэрбэт, эгэ сүбэ-ама биэриэ дуо... Дьэ, хайдаҕый? Сүтүктээх, бастатан туран, уолун сэриигэ ыыппыт военкоматтан кэлэн ирдэһэрэ, көмө көрдүүрэ сөп буолбатах дуо? Чопчу көмө, саатар сүбэ-ама, тоҕо манна оҥоһуллубат?
Сэрии толоонугар охтубут оҕолоох дьүөгэтин өйүү Бүлүүттэн кэлбит Мария ОКОНЕШНИКОВА:
- Бэҕэһээ дьүөгэм «уолгун сэрии хонуутуттан таһаардыбыт» диэн ыар сураҕы туппута. Инники уолу кытта бииргэ сылдьыбыт дьон «алта эрэ уолу кыайан таһаардыбыт, атыттар онно хааллылар» диэн кэпсээбиттэр этэ. Бэҕэһээ суох буолбута бигэргэнэн, салгыы тугу гынарын билээри кэлбиппит: баран бэйэтэ аҕалар дуу, хамсанан испэт салалтаны кэтэһэн күнү-дьылы барыыр дуу... Военкомакка ити боппуруостарынан Вадим Владимирович Чикельдин диэн үлэһит дьарыктанар диэтилэр да, сирэй көрсөн кэпсэппэтэ. Уолбут дааннайын эрэ ыыттарда. Бу олордохпутуна наһаа элбэх төрөппүт кэлэн барда. Ол тухары биир да киһини киллэрбэтэ. Барахсаттар муммут дьон курдук халтайга кэлэн бараахтаатылар. Бу сүтүктээх эдьиийгэ 117 нүөмэри (Арассыыйа үрдүнэн үлэлиир аһаҕас лииньийэ) биэрэммин, хата онно эрийэн кыһалҕатын эттэ, - диэн военкомат «үлэтиттэн» кэлэйбитин-абарбытын биллэрдэ.
Анал байыаннай дьайыыга бараат сүппүт сурдьун көрдүүр Валентина Михайлова,:
- Сурдьум Вячеслав Кимович Михайлов атырдьах ыйын бүтүүтэ анал байыаннай дьайыыларга Вагнер этэрээтин кэккэтигэр киирэн барбыта уонна онтон ыла сибээскэ суох. Тыаҕа олорор кыра сурдьум уонна балтым «наһаа өр биллибэтэ, баран ирдэс» диэннэр, манна кэлэн олоробун. Военкомакка туох да көмө оҥорботулар. Саатар сүбэ-ама биэрбэтилэр. Анкета, бланк эҥин толоруута диэн кэлиэ дуо? Мэлигир. Хата бу, эмиэ бэйэбит курдук кыһалҕалаах дьон, 117 нүөмэри этэннэр, онно эрийэн олоробун. Күн устата биллэриэхпит диэтилэр, - диэн эрэл кыымнаах кэпсээтэ.
Уола суох буолбутун бэҕэһээ эрэ истибит ийэ барахсан, военкоматтан тугу да туһаммакка тахсан, дьүөгэлэрин аттыгар хараҕын уутунан сууна, аймана хаалла... Бэйэтэ, Донецкайга, Ростовка волонтерунан сылдьыбыт буолан, билэр дьонуттан уолун туһунан эбии иһитиннэрии кэтэһэр.
Оттон манна, Саха сиригэр, киниэхэ тутатына көмөлөһөр биир даҕаны тэрилтэ суох буолан биэрдэ. Киһи эрэ бэркиһиир. Кэпсэппит дьонтон хайалара да 122 нүөмэргэ эрийбэтэх, Биир кэлим сүрүннүүр кииҥҥэ (ЕКЦ) тиийбэтэх. Оччотугар үлэ кимиэхэ анаан ыытыллар? Сүтүктээх дьон тоҕо муна сылдьаллар?
Бэйэ кэр.
Сэҥээриилэр