Өрөспүүбүлүкэ киин куоратыгар Уһук Илиҥҥи федеральнай уокурукка аан бастакы «Школа 21» оскуола – информационнай технологияларга каадырдары бэлэмниир аныгы киин - аһылынна.
Бырайыак 18 үөһэ саастаах дьону ИТ эйгэтин сатабылларыгар үөрэтэр уонна бу эйгэҕэ саҥа идэлэри баһылыырга, үрдүк таһымнаах исписэлиистэри бэлэмнээн таһаарарга көмөлөһөр.
Үөрүүлээх тэрээһини Ил Дархан Айсен Николаев уонна Сбербанк бырабылыанньатын бэрэссэдээтэлэ Герман Греф арыйдылар.
«Сберы кытта ПМЭФ кэмигэр илии баттаһыахпытыттан биэс ый кэриҥэ ааста. Оскуола айтишниктарга олус суолталаах сиргэ – MyTona хампаанньа үлэлээбит дьиэтигэр аһылынна. Манна үөрэтии таһыма үрдүк буолуо, исписэлиистэр үлэ ырыынагар былдьаһыкка сылдьыахтара диэн эрэнэбин - диэтэ Айсен Николаев.
«Саха сирин олохтоохторо эдэр уонна эрчимнээх, ону сэргэ мындыр толкуйдаах баһылыктаахтарыттан үөрүөх тустаахтар. «Школа 21» адьас кылгас кэм иһигэр тэрилиннэ. Эспиэрдэр сыанабылларынан, оскуола бары өттүнэн ханна да суох үрдүк таһымнаах. Биһиги устудьуоннарбытын үөрэхтэрин бүтэрэ да иликтэринэ үлэҕэ ылааччылар. Онон сотору кэминэн үлэ ырыынагар үчүгэй исписэлиистэр киирэллэрэ саарбаҕа суох», - диэтэ Герман Греф.
Кинилэри кытары тэрээһиҥҥэ СӨ бырабыыталыстыбатын бэрэссэдээтэлин солбуйааччыта Анатолий Семенов, инновация миниистирэ Василий Ефимов, «Школа 21» дириэктэрэ Александр Федяков уонна маннааҕы кампус дириэктэрэ Светлана Софронова кытыннылар.
Бэйэ кэр.
