Анал байыаннай дьайыы кыттыылаахтарыгар оҥоһуллар көмөҕө бары улуустар кыттыһаллар. Санкт-Петербург куорат госпиталларыгар ыарахан туруктаах байыастары аҕалаллар. Кинилэри ийэлии көрө-харайа сылдьар биир дойдулаах волонтердарбытын кытта Горнай улууһуттан эдэр исписэлиистэр кэлэн көрүстүлэр.
Дьаһалта ыччаты кытта үлэҕэ исписэлииһэ Сардана Алексеева, бибилэтиэкэ үлэһиттэрэ Анастасия Сергеева, Олеся Федорова буола турар быһыыны-майгыны эттэринэн-хааннарынан билсэ сылдьар дьонтон иһиттилэр.
Көннөрү өрбөххө сууланан кэлбит, арыт кимэ-туга биллибэт бааһырбыт саллааты кыра оҕолуу бүөбэйдиир, олоххо төннөрөр уустук үлэни толоро сылдьар дьон кэпсээнэ ыарахан. Эдэр исписэлиистэр байыастар ордук туохха наадыйалларын, усулуобуйа хайдаҕын ыйыталастылар.
Кинилэр аҕалбыт астарын-үөллэрин волонтердар үллэстэн, астаан-үөллээн, госпиталларга сытар саха байыастарыгар тиксэриэхтэрэ. Оттон ыччат кыргыттар салгыы туох үлэни ыытарга, байыастарбытыгар тугунан көмөлөһөргө суолу-ииһи тобулуохтара.
Оксана Жиркова. Санкт-Петербург.
