Анаабыр национальнай (долган-эбэҥки) улууһун киинигэр өрөспүүбүлүкэтээҕи судаарыстыбаннай тосхол өйөбүлүнэн саҥа үүт собуота тэриллэн үлэҕэ киирдэ. Собуоту арыйыах иннинэ оҥорон таһаарар кыаҕын тургутан көрдүлэр, бородууксуйатын Дьокуускай куорат лабораторияларыгар илдьэн бэрэбиэркэлэттилэр. Ити курдук, собуоту үчүгэй түмүк кэлбитин кэннэ биирдэ арыйдылар.
«Сааскылаах маҕаһыыннарыгар бастакы олохтоох үрүҥ ас атыыга таҕыста. Үүт собуота Н.Е. Андросов аатынан элбэх хайысхалаах унитарнай тэрилтэ иһинэн аһылынна. Тэрилтэ үрүҥ аһы оҥорор тэрилинэн толору хааччыллыылаах. Үрүҥ аска олохтоммут стандарт уонна ирдэбил барыта тутуһуллар. Онон, чэгиэн уонна сибиэһэй бородууксуйа мэктиэлэнэр», – диэн СӨ Арктиканы сайыннарыы уонна хотугу норуоттар дьыалаларыгар миниистирэ Владимир Черноградскай кэпсээтэ.
Унитарнай тэрилтэ дириэктэрэ Александр Михайлов эппитинэн, үүт собуота күҥҥэ 500-тэн 2 000 лиитирэҕэ тиийэ үүтү астыырга анаммыт. Онон, хоту сир олохтоохторо удамыр сыаналаах үрүҥ аһынан хааччыллалларын таһынан, манна үлэҕэ киирэр кыахтаннылар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
