Бу күннэргэ Амма улууһун Болугур сэлиэнньэтин бөрө үөрэ буулан, куттанан таһырдьа да тахсыбат буолбуттарын туһунан «ужас» киинэлэртэн итэҕэһэ суох дьулаан суруйуу тарҕанна. Ким суруйбута биллэр буолан, киһи дэбигис итэҕэйэр.
Чопчулуур уонна көмөлөһөр санааттан киниэхэ эрийэн тиийбиппитигэр, суруйбутун барытын бигэргэтэн: «Бөрөлөр буулаабыттара ыраатта. Түүн дьиэбит аттыгар кэлэн сүүрбүттэригэр ыксаан суруйдум. Бөлүүн сылгы базатыгар кэлэн бүтүн үөрү тутан барбыттар үһү! Иллэрээ күн сыбаалкаҕа чааһынай киһи үс сылгытын тардыбыттар! Аны туран, ыал тиэргэнигэр киирэн, ыттарын соһон барбыттар! Оттон дьаһалта барытын саба тутан, кистээн олорор. Ол иһин киэҥ эйгэҕэ таһаардым», - диэн хаттаан кэпсээтэ. Бэл, кыһалҕаны быһаартараары, баһылык нүөмэрин булан ыытта.
Онон, баһылыкка эрийэн, бөрөлөр төгүрүктээһиннэрин туһунан сурах төһө оруннааҕын, дьиҥнээх балаһыанньа хайдаҕын ыйыталастыбыт. Баһылык Андрей Петров, итинник сурук тарҕаммытын истэн, улаханнык соһуйда уонна сэлиэнньэҕэ туох да куттал суоһаабатын иһитиннэрдэ, ааптары билбэт киһитэ буолан биэрдэ. Арай, биир ыйы кыайбат кэм анараа өттүгэр булчут уолаттар үс бөрөнү бултаабыттарын, оттон бөрө сылгыны тардыыта иллэрээ эрэ сыл бэлиэтэммитин эттэ.
Ити курдук, олохтоох уонна баһылык икки атын-атын хартыынаны ойуулаатылар. Онон, «Болугур бөрөлөрүн» итэҕэйэ охсорго ыксаамаҥ.
Бэйэ кэр.
