Тохсунньу 24 күнүгэр Белгород уобалаһын Яблоново сэлиэнньэтин аттыгар Украина билиэннэйдэрин атастаһыыга тиэйэн испит ИЛ-76 сөмөлүөтү сууллардылар. 65 билиэннэйи уонна 3 арыалдьыты таһынан, экипаж 6 чилиэнэ бары өллүлэр. Кинилэр кырамталарын кытта икки «хара дьааһыгы» буллулар.
Экипаж, сөмөлүөтү сэлиэнньэ үрдүгэр түһэримээри, олоҕун толук уурда. Хамандыыр Беззубкин, хамандыыр көмөлөһөөччүтэ Чмирев, штурман Высокин, бортинженер Пилуев, борттехник Житенев, бортрадист Саблинский – Оренбург уобалаһын 117-с авиационнай полкатыгар сулууспалыы сылдьыбыттара. Оренбург куорат олохтоохторо кинилэри кэриэстээн мемориал тэрийдилэр, оттон Яблоново сэлиэнньэ часовнятыгар панихида оҥордулар. РФ бырабыыталыстыбата кинилэри судаарыстыбаннай наҕараадаларга түһэриэҕэ.
Сөмөлүөт сууллаатын кытары Украина сырдатар-иһитиннэрэр ханааллара сөмөлүөтү РФ ВСУ суулларда диэн сонуну тарҕатта. Оттон Арассыыйа силиэстийэлиир кэмитиэтэ террагы оҥорууга холуобунай дьыала тэрийдэ. Сөмөлүөт тас өттүттэн ракета элэмиэннэрин буллулар. Билигин Эмиэрикэ Patriot ракетатынан ыппыттара сабаҕаланар. Чопчу баллистическай эспэртиисэ түмүгэ көрдөрүө.
Белгород уобалаһыгар атастаһыыга барар билиэннэйдэр испииһэктэрин Украинаны кытта үс хонуктааҕыта сөбүлэспиттэр. Улахан аҥаардара 2022 сыллаахха Мариупольга тутуллубуттар эбит. Бары кэриэтэ рядовойдар. Саамай эдэрдэрэ - 21, аҕалара - 59 саастаахтар.
Хаартыска: НТВ, Известия
Бэйэ кэр.
