Хаҥалас улууһун Мохсоҕоллоох сэлиэнньэтигэр Айсен Николаев «Якутцемент» эбийиэктэрин көрөн баран өрөспүүбүлүкэҕэ тутуу эйгэтин матырыйаалынан хааччыйыы туһунан сүбэ мунньах ыытта.
Ил Дархан тэрилтэ салайааччытын Алиш Мамедовы уонна бары үлэһиттэри ааспыт сылга таһаарыылаахтык үлэлээбиттэрин иһин махтанна. Ол курдук, «Якутцемент» 580 тыһ. туонна сиэмэнтэ араас көрүҥүн оҥорон хампаанньа устуоруйатыгар рекорд олохтоото.
«Кэнники биэс сылга хампаанньа икки төгүл элбэҕи оҥорон таһаарар буолла. Биллэн турар, мантан олус улахан нолуок төлөнөр. Быйылгы нолуок кээмэйэ 1 млрд 600 мөл. солкуобайга тиийиэн сөп. Итини сэргэ эбии үлэ миэстэтэ тахсар, хамнастара үрдүүр», - диэн кини бэлиэтээтэ.
Айсен Николаев этэринэн, билигин өрөспүүбүлүкэҕэ тутуу балсыханнык бара турар. Оттон олорор дьиэни, социальнай, промышленнай эбийиэктэри, суолу тутууга элбэх сиэмэнтэ ирдэнэр. Онон, быйыл тэрилтэ иннигэр 600 тыһ. туонна сиэмэнтэни оҥорон таһаарар соругу туруордулар. Маны таһынан, щебень уонна отсев элбэхтик оҥоһуллуоҕа.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, ЯСИА