Бүгүн эрэдээксийэбитигэр Нам улууһун Партизан сэлиэнньэтиттэн сүтүктээх Артем Соловьев суруйда. Тохсунньу 6 күнүгэр сарсыарда 5.30 чааска кини чааһынай дьиэтин далыгар икки ыт киирэн аһыы турар убаһатын, тыыннаахтыы тырыта тыытан, иһин-үөһүн хостоон, сиэмэх кыыллыы өлөрөн барбыттар. Ол эрээри бу ыттары кимнээх бэйдиэ ыыппыттара аныаха диэри биллибэккэ турар. Тулаайах хаалыаҕыттан бүтүн дьиэ кэргэнинэн кыһыл оҕо курдук суосканан аһатан, көрөн-харайан улаатыннарбыт, күүскэ убаммыт кыылларын олус аһыйалларын, онон хоромньуларын төлөтөр санаалаахтарын эттэ.
Артем Валерьевич убаһатын сиэбит ыттары кыл мүччү хаартыскаҕа түһэрбит уонна туһааннаах уорганнарга үҥсүбүт. Эрдэ нэһилиэк ыттарын барыларын чиптээн учуокка туруорбут буоланнар, хаһаайыттара дэбигис көстүөхтэрэ диэн эрэнэн сылдьыбыт. Ону баара, ыттары кимнээх босхо ыыппыттара күн бүгүнүгэр диэри биллэ илик. Арай, хаартысканан көрөн биирин хаһаайыннаах, биирин бэйдиэ сылдьар ыт диэн сылыктыыллар. Ыттар хаартыскаларын бассаабынан тарҕатан көрдүү сатаабыттар да, ким да билиммэтэх, этэн биэрбэтэх.
Тохсунньу 9 күнүгэр бэтэринээртэн ылбыт ыспыраапкатынан олохтоох дьаһалта аатыгар суруйбут сайабылыанньатыгар, улуус борокуратууратыгар суруйбут үҥсүүтүгэр аныаха диэри харда суох. Күлүү гыммыт курдук чиптэммит ыттар испииһэктэрин көрдөрбүттэр. Намнааҕы ветстанция үлэһитэ кэлэ сылдьан «ыт хаһаайынын бэйэҥ бул эбэтэр ыты бэйэҥ тут» диэн сүбэлээбит. Бүтүн дьаһалта булан ылбат ыттарын соҕотох киһи хайдах бэйэтэ булан сыгынньах илиитинэн тутарын бэркэ диэн билэллэр быһыылаах эбэтэр киинэҕэ көрбүттэрэ дуу?
Ол да иһин сүтүктээх «Салгыы тугу гынабын, хайдах ирдэһэбин? Үгүс сыранан иитэн таһаарбыт кыылым ким буруйунан ыт аһылыга буолбутун билбэккэ ытыс соттон хаалабын дуо? Эппиэтинэһи ким сүгэр? Убаһабын ким төлүүр?» диэн сөҕөн, абаран биһигиттэн ыйытар.
Кырдьыга да, киһи эрэ бэркиһиир. Биир тыһыынчаны кыайбат нэһилиэнньэлээх сэлиэнньэҕэ ким хайдах ыттааҕа син биллэн эрдэҕэ. Эбэтэр, Партизан сэлиэнньэтин дьаһалтата, «партизаннаах» оонньуурга сананан, быһылааны, сиэмэх ыттары, хаһаайыттарын кистииргэ санаммыт?
Оччотугар бэйдиэ сылдьар ыт оҥорбут эчэйиитигэр эбэтэр таһаарбыт хоромньутугар муниципальнай тэриллии салайааччыта эппиэттиир диэн өссө биирдэ санатабыт. Онон, сүтүктээх Артем Соловьев ыттары дьаһайар туһааннаах тэрилтэни (ол эбэтэр, баһылыгы) суукка үҥсэр бырааптаах.
Хаартыска: Артем Соловьев
Бэйэ кэр.
