“Yakutia24” социальнай ситимнэригэр уонна саайтыгар соторутааҕыта эрэ Дьокуускайга “Пятерочка” диэн удамыр сыаналаах ас-үөл маҕаһыынын ситимэ арылларыахтааҕын туһунан суруйбуппут. Дьиҥэр, ситим маҕаһыыннара, франшиза, өссө былырыын күһүн арыллыахтааҕа эрээри, бастаан утаа сонун-нуомас тарҕанан иһэн, сүтэн-симэлийэн хаалбыта.
Бу күннэргэ “Yakutia24” ити дьыалаҕа сыһыаннаах уонна ис-иһиттэн билэр дьон иһитиннэрбиттэринэн, ситим маҕаһыыннара бу ый бүтүүтүгэр Дьокуускайга уонна Нерюнгрига арыллыахтара үһү. Өссө ааспыттааҥҥы матырыйаалбытыгар “Дьокуускайга бастакы маҕаһыын Киров уул. 30В дьиэтигэр, “Силуэт” атыы-эргиэн киинин кэннигэр, арыллыах курдук” диэбиппит. Ол дьиэ былырыын сааскыттан кураанах турбута. Атын маҕаһыыннар “Ураһа Молл”, “Азия” аралдьытар-саататар кииннэргэ, Федор Попов уул. 23 уонна Дежнев уул. 30 дьиэлэригэр баар буолуохтарын сөп. Билигин ити ыйыллыбыт сирдэргэ өрөмүөн үлэтэ оргуйан олорор. Уопсайынан, Дьокуускайга быһа холоон 40 атыы-эргиэн туочуката баар буолуохтаах үһү.
Онон, бу ыйга федеральнай ситим маҕаһыыннара арыллалларын күүтэбит.
"Yakutia24" суруйуутуттан
