Саха сирин идэлээх сойуустарын федерациятын сүбэтин муус устар 10 күнүнээҕи мунньаҕар Саха сиригэр Бүтүн Арассыыйатааҕы Пиэрибэй маай аахсыйатын хайдах быһыылаахтык ыытары быһаарыстылар. Бэлиэ күн «Достойный труд каждого – гарантия благополучия семьи и развития страны!» диэн лозуннаах ааһыаҕа.
Сүбэ кыттыылаахтара быйылгы Пиэрибэй маай бырааһынньыгын өрөспүүбүлүкэ, муниципалитет, идэлээх сойуус таһымыгар мунньахтары ыытан үлэһит дьон кыһалҕатын тула кэпсэтэн атаарар ордук буолуо диэн быһаардылар. Маны сэргэ, үлэһит династиялары, үлэҕэ уһуйааччылары, бастыҥ үлэһиттэри чиэстиир, оҕолордоох дьиэ кэргэннэри көҕүлүүр, ыччакка дойдуга бэриниилээх буолууну иҥэрэ тэрээһиннэри ыытыах буоллулар.
Ол эбэтэр, биһиги өйдөөбүппүтүнэн Пиэрибэй маайдааҕы хаамыы буолбат. Идэлээх сойуустары салайар Николай Дегтярев үлэһиттэр бырааптарын туруорсар суолталаах күнү бэлиэтииргэ араас ньыманы туттарга сүбэлээтэ, ол эрээри биир уопсай торум баар буолуо диэн эрэннэрдэ.
Сонун төрдө: СӨ идэлээх сойуустарын федерациятын пресс-сулууспата
