Уус Алдан улууһун Танда сэлиэнньэтигэр 150 миэстэлээх успуорт саалатын тутуу саҕаламмытын бэлиэтиир тэрээһин муус устар 12 күнүгэр үөрүүлээх быһыыга-майгыга ыытылынна. Бу Гражданскай сэрии Дьоруойа Гаврил Егоров, Сэбиэскэй Сойуус Дьоруойа Владимир Лонгинов, Үлэ Дьоруойа Михаил Готовцев уонна Арассыыйа Дьоруойа Алексей Неустроев төрөөбүт дойдулара.
«Бүгүн Анатолий Заболоцкай аатынан успуорт саалатын тутууну саҕалыыбыт. Манна оҕолор уонна улахан дьон физкултууранан уонна успуордунан дьарыктаналларыгар бары усулуобуйа баар буолуоҕа. Ону сэргэ өрөспүүбүлүкэ үтүөлээх тириэньэрэ Максим Аммосов иитиллээччилэрэ эмиэ дьарыктаныахтара. Танда кыргыттарын волейболга хамаандата өрөспүүбүлүкэҕэ биир бастыҥнара буолар», - диэн бырабыыталыстыба бэрэссэдээтэлин солбуйааччы Сергей Местников бэлиэтээтэ.
Эбийиэк хайыы үйэ 67 сыбаайата түһэн, тоҕус киһилээх бөлөх үлэлии сылдьар. Икки этээстээх,1,3 тыһ.кв. миэтэрэ иэннээх дьиэни эһиил 2025 сылга үлэҕэ киллэриэхтэрэ. Өссө сотору сэлиэнньэҕэ хочуолунай тутуута саҕаланыа. Маны таһынан, Култуура дьиэтин бырайыактаах-симиэтэлээх докумуоннарын бэлэмнииллэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
