«Айарбук» ааҕыыга аналлаах саҥа мобильнай сыһыарыы сүрэхтэннэ

Бүгүн, олунньу 18 күнүгэр, «Айарбук» диэн ааҕыыга аналлаах саҥа мобильнай сыһыарыы сүрэхтэниитэ буолла. Бу сыһыарыыны «Айар» национальнай кинигэ кыһатын генеральнай дириэктэрэ А.В. Егоров көҕүлээһининэн, А. Баишев салайааччылаах «Квантум» IT-компания көмөтүнэн «Айар» оҥорон таһаарда.

2010 сылтан "Айар" электроннай учебниктары оҥорор уопуттаах буолан, бу электроннай уонна аудио-кинигэлэр киирбит сыһыарыылара күүтүллүбүт бородуукт буолар. 2020 сылтан үлэтэ саҕаланан, быйыл ийэ тыл күнүн көрсө, «Айарбук» сыһыарыы күн сирин көрдө.

Бу сыһыарыыга уопсайа 500-тэн тахса: 470 электроннай уонна 70-ча аудио форматтаах саха, нуучча, хотугу норуоттар тылларынан кинигэлэр киирдилэр. Оҕоҕо, төрөппүккэ анаммыт литература, прикладной кинигэлэр, уус-уран айымньылар, сынньалаҥҥа, аска–үөлгэ анаммыт таһаарыылар киирдилэр. Манна 100-тэн тахса босхо аудио уонна электроннай кинигэлэр бааллар.

Сыһыарыыга суруттарарга тус бэйэҕитигэр табыгастаах тарыыбы талыахха сөп. «Айарбук»-ка сурутуу - туох да хааччаҕа суох сыһыарыынан туһаныы. Ол эбэтэр, суруппут дьон биир-икки кинигэни эрэ буолбакка, библиотеканы барытын ааҕыахтарын сөп.

Ол курдук, дьон «Премиум» тарыыбынан библиотека бары кинигэтин туһаныахтарын сөп, оттон «Стандарт» тарыып оҕолорго аналлаах уонна уус-уран литература айымньыларын ааҕарга кыах биэрэр.

Онон, «Айарбук» сурутааччылара төһө баҕарар кинигэни эрдэттэн интэриниэттээх сиртэн хачайдаан ылан, сибээһэ суох сиргэ даҕаны сылдьан, сөбүлүүр кинигэлэрин ааҕар кыахтаналлар.

Сыһыарыыга бастаан киирдэххэ, 14 күн босхо туттуу кыаҕа бэриллэр.

«Айар» кинигэ кыһатын биир сүдү айымньыта аныгы олоххо тустаах, туһалаах таһаарыыта киэҥ эйгэҕэ тарҕанан, биллэн-көстөн, туһалаан иһиэ диэн биһиги бары бигэ эрэллээхпит.

Кинигэни ааҕыҥ, истиҥ, өрүү илдьэ сылдьыҥ! Сахабыт сирин норуоттарын тыллара, литературата сайда турдуннар уонна хас биирдии ааҕааччыга тиийдиннэр.