Өрөспүүбүлүкэтээҕи суһал Ыстаап киинин иһитиннэриилэригэр олоҕурдахха, Мииринэй оройуонугар хоруона хамсыга намыраата.
Ол сыыппаранан чахчылартан ырылыччы көстөр.
Хоруона дьаҥа тохсунньуга – 566, олунньуга – 2.506, кулун тутар ыйга – 1.375, муус устарга – 388 бэлиэтэммитэ. Оттон ыам ыйын устата 128 ыалдьыбыт баара билиннэ.
Бу – Мииринэй уонна Удачнай эмчиттэрин сүҥкэн кыайыылара. Быһыыны маҥнайгытын уонна хаттаан ылыы ситиһиилээхтик ыытыллыбытын кэрэһитэ.
Итинэн сэдиптээтэххэ, балаһыанньа көнүөх курдук. Ол эрээри, хоруона хамсыга «хаптайда» диир оруна суох. Дьаҥ кимиитэ тохтотулунна, ол эрээри, кини иһийдэ. Хайдаҕын да иһин, биһиги оройуоммут кэлии-барыы, баахта дойдута. Навигациябыт Иркутскай уобалаһа суох сатаммат. Суолбут-ииспит - эмиэ бу эрэгэйиэни кытары ситимнээх. Уонунан баахта «материктан» кэлэр. Хайа уонна Мииринэй оройуонун олохтоохторун баһыйар үгүстэрэ соҕуруу дьиэлээх-уоттаах дьон. Барыы-кэлии элбэх. Дьэ, онон, хамсык хайдах баҕарар «ньыманан» Саха сиригэр өссө төхтүрүйэн кэлиэн сөп. Аны, Кытайга мөлүйүөнүнэн дьону харантыыҥҥа хаайбыт стелс-омикрон Забайкальеҕа дэбигистик кэлэр кыахтаах. Оттон Забайкалье сүүһүнэн дьоно Мииринэй, Ленскэй оройуоннарыгар үлэлииллэр. Сэрэнэр-сэппэнэр наада. Дьаҥ букатыннаахтык кыайтарбата.
Станислав Алексеев. Мииринэй куората. МЦРБ саайтыттан хаартыска.
