Бэҕэһээ социальнай ситимнэринэн Дьааҥы улууһун ууга барбыт нэһилиэктэриттэн киһи уйадыйбакка эрэ көрбөт элбэх хаартыската, видеота тарҕаммыта. Олортон биирдэстэригэр кырачаан уоллаах кыыс, дьиэлэрин тас үктэлигэр тураннар, тиэргэннэрин иһинэн халаан уута тоҕо анньан ааһарын өйдөөбөтөхтүү оҥой-соҥой көрөн тураллара. Бүгүн биһиги аан ситиммит 8(914)820 09 75 нүөмэригэр уолчаан аҕата Валерий Старостин оҕолор тустарыгар олус долгуйан уонна абаран эрийэ сырытта.
Кини кэпсииринэн, Дьааҥы улууһун ууга барбыт Дулҕалаах нэһилиэгэр бөртөлүөт кэтэспиттэрэ үһүс күнэ. Дьокуускайтан эбэлэригэр сайылыы барбыт 5 cаастаах оҕото уонна 5 cаастаах балта билигин даҕаны уу ылбыт сиригэр кутталга олороллор. "Иккис долгун кэлиэхтээх дииллэр уонна оҕолору көһөрө охсубаттара сүрдээх", - диэн төрөппүт долгуйуута улахан.
Онуоха, киин куоракка кыһалҕаларын быһаарса кэлбит Дулҕалаах олохтоохторо, халаан саҕалаанаатын кытта төннөннөр, билигин Баатаҕайга тиийэн хаайтаран сылдьаллар. Кинилэр дьиэлэрин-уоттарын, малларын-салларын быыһаары, дьонноругар көмө буолаары ыксыыллара кэмэ суох. Ол тухары кинилэргэ биир даҕаны нэһилиэк, улуус баһылыга чопчу хоруйу биэрбэттэр, сибээскэ суохтар. Арай бөртөлүөт илдьэр да буоллаҕына, төлөбүрдээх эрэ илдьэр үһү диэн иһитиннэрии кэлбит. Ол эбэтэр, тиийбит бөртөлүөт Дулҕалаах оҕолорун эмиэ төлөбүрдээх эрэ аҕалар буолан тахсар.
Биһиги улуус баһылыгар Гаврил Чириковка уонна киин куоракка улуус түмсүүтүн салайааччытыгар Гаврил Чемохановка эрийэн көрөн бараммыт, кыайан тиийбэккэбит, СӨ Ыксаллаах быһыыга-майгыга министиэристибэтин дьуһуурунайыгар эрийэ сырыттыбыт. Кини, Дулҕалаах нэһилиэгэ диэни тута өйдөөбөтөр даҕаны (бу нэһилиэги наар Борулааҕы-Томтору кытта булкуйаллар эбит), син быһаарса сатаата. Ол курдук, МЧС бөртөлүөтүнэн Уу ылбыт нэһилиэктэриттэн Баатаҕайга дьону көһөрүү бүгүн халлаан туругунан кыаллыбат, онон сарсыҥҥы былааҥҥа киирдэ диэн иһитиннэрдэ. Көһөрүү төлөбүрдээх диэн кэпсэл олоҕо суох диэтэ.
Маннык ыксаллаах быһыыга-майгыга кыһалҕалаах дьоҥҥо хоруй биэрэр соҕотох үлэһит, арааһа, бу эрэ дьуһуурунай буоллаҕа. Оттон бырабыыталыстыба уонна улуус дьаһалтатын таһымыгар Дьааҥы ууга барбыт олохтоохторугар быһаарар үлэни ыытар, ыйан-кэрдэн биэрэр туох даҕаны оперативнай штаб, диспетчер пууна тэриллибэтэх курдук.
Өссө биир түгэн. Киин куораттан Дулҕалаахха сайылыы тиийэн баран ууга барбыт оҕолор улуус оҕолорун курдук лааҕырга сынньана киирэр бырааптара суох эбит. Оччотугар, кинилэр хас эмэ күнү быһа кутталга, аанньа аһаабакка, утуйбакка олорбуттарыгар, ситэри сайылаабакка көһөргө күһэллибиттэригэр, улахан охсууну ылбыттарыгар ким даҕаны эппиэтинэс сүкпэт буоллаҕа? Биир кыһалҕаҕа түбэспит оҕолору пропискалаах, прописката суох диэн араарар сүөргү буолбатах дуо? Биһиги санаабытыгар, халааҥҥа түбэспит оҕолор бары тэҥ бырааптаахтар. Онон, кинилэр бырааптара төһө туоларын-туолбатын билэ туруохпут диэн эрэннэрэбит.
P.S. Төрөппүт Валерий Старостин,биһиги сүбэбитинэн, СӨ Ыксаллаах быһыыга-майгыга министиэристибэтин дьуһуурунайыгар эрийэн бөртөлүөт туһунан чопчуласпыт. Киниэхэ оҕолору Дулҕалаахтан Баатаҕайга бөртөлүөтүнэн илдьии, онтон Дьокуускайга аҕалыы сарсын буолуо диэн хоруйдаабыттар. Онон, оҕолор барахсаттар киин куоракка этэҥҥэ көтөн кэлэллэригэр баҕарыаҕыҥ.
Бэйэ кэр.
