Ааспыт өрөбүлгэ Москуба куоракка түспүт күүстээх силлиэ элбэх иэдээни аҕалбыт. Силлиэ 255 маһы суулларбыт, тоҕус дьиэ үрүт бүрүөһүнүн көтүппүт. Силлиэни кытта түөрт ыйдаах нуорманы куоһарар күүстээх ардах түспүт.
Мас сууллуутуттан 2 эр киһи олоҕо быстыбыт. Алтай кыраайыттан сылдьар 27 саастаах эр киһи Украина бульварыгар сылдьан былаҕайга былдьаммыт. Оттон 63 саастаах эр киһи Ивантеевскай уулуссаттан чугастыы ойуурга сылдьан түбэспит.
Уопсайа 15 улахан киһи, 3 оҕо эчэйбит, сүүстэн тахса массыына алдьаммыт. Эмсэҕэлээбит дьон ортотугар түөрт ыйдаах оҕолоох 42 саастаах дьахтар баар эбит. Кини Каретнай ряд "Эрмитаж" саадыгар сайыҥҥы кафе олордоҕуна, шатер үрдүгэр мас сууллубут. Ийэ элбэх тостуулаах буоллаҕына, оҕото улаханнык эчэйбэтэх.
Бэҕэһээ Москубаҕа, эмиэ халлаан туругунан, Парк Горького, Сокольники, Музеон, Эрмитаж, Фили, Измайловский, Парк Победы на Поклонной горе сынньалаҥ зоналарын саптылар диэн куорат аан ситимнэрэ суруйаллар. Арассыыйа тэбэр сүрэҕэр бүгүҥҥээҥҥэ диэри өҥүрүк куйаас турбут буоллаҕына, синоптиктар сотору сөрүүн түһэрин билгэлииллэр.
Хаартыска: Газета.ру, 9111.ру
