Бүгүн тыа хаһаайыстыбатын министиэристибэтигэр хороҕор муостааҕы иитиинэн дьарыктанар бастыҥ үлэһиттэр кыттыылаах мунньах буолар. Бу тэрээһин Үлэ Албан аат уордьан толору кавалера Владимир Африканович Михайлов 65 сааһын бэлиэтиир үбүлүөйүгэр ананар.
Владимир Африканович оскуола кэнниттэн «Бордоҥ» сопхуоһугар ыанньыксытынан үлэлээн саҕалаабыта. 1979 сыллаахха биир ынахтан 4250 кл үүтү ыабыт. Кини билигин Сунтаар улууһугар “Кириэстээх” оҥорон таһаарар кооперативка үлэлии-хамныы сылдьар.
“Билигин 30 ыанар ынахтаахпын, бу сылга биирдии ынахтан 4100 кл үүтү ыатым. Оту, сиилэһи тарҕатар, ууну биэрэр аптамааттаах бэйэтэ үлэлиир тэриллээхпит. Илиинэн ыабат буолбуппут быданнаата. Онон, үлэлииргэ бары усулуобуйа баар диэххэ сөп. Түөрт сыл аннараа өттүгэр Алтайтан кыһыл өҥнөөх ынахтары аҕалбыттара. Үчүгэйдик аһаттахха элбэх үүтү биэрэллэр. Мин 65 сааспын туоллум, өссө да эдэрбин дии сананабын. Инникитин доруобуйам төһө кыайарынан таһаарыылаахтык үлэлиир баҕа баар. Үлэбин олус сөбүлүүбүн, сороҕор төбөм эҥин ыарыйдаҕына, үлэбэр кэллэхпинэ ааһан хаалар”, – диэн Владимир Африканович үөрэ кэпсиир.
Владимир Михайлов бастыҥ үлэтин иһин ылбыт үрдүк наҕараадалара: 1976, 1983, 1991 сс үс степеннээх Үлэ Албан аат уордьан толору кавалера; 1981 с –“Үлэ килбиэнэ”; 1982 с – “Эдэр гвардеец” уонна Гагарин аатынан “Сулустаах вымпел”; 2011 с СӨ “Хотугу сулус” уордьан кавалера; 2015 с дойду Президениттэн “Бочуот знага уордьан” ылбыта.
