Нам улууһун олохтоохторо 104,3 долгуҥҥа “Эҥсиэли” радионы истэр кыахтаннылар. Бу туһунан СӨ инновация министиэристибэтин пресс-сулууспата иһитиннэрэр.
Радионы үлэлэтии бэлиэ кунуопкатын улуус баһылыга Юрий Слепцов, “Телевидения уонна радио техническэй киин” генеральнай дириэктэрэ Андрей Ребров уонна ыстаансыйа салайааччыта Гаврил Мальцев баттаатылар.
“Эҥсиэли" радио улуус бары эйгэтин хабар буолуоҕа. Ол курдук, улуус сонуннара, интэриэһинэй дьарыктаах, туйгун үлэлээх дьону кытта кэпсэтиилэр, биллэриилэр уонна ырыа-тойук күннэтэ радио долгунуттан кутуллуоҕа.
“Олохтоохтор “Эҥсиэли” радионы истэллэрин сөбүлүөхтэрэ диэммин эрэнэбин. Айар кэллэктиип бары идэтийбит дьон. Онон араас көлүөнэ дьонугар аналлаах интэриэһинэй биэриилэри толкуйдаан таһааралларыгар саарбахтаабаппын”, – диэн СӨ инновация миниистирин солбуйааччы Чокуур Гаврильев эттэ.
