Бу сылга тыа сиригэр мэдэссиинэ үлэһиттэрин тардыыга өрөспүүбүлүкэ салалтата 132 мөл тахса солк көрөр былааннаах. Үлэ “Доруобуйа харыстабыла” национальнай бырайыак чэрчитинэн ыытыллар. Бу туһунан ТАССка СӨ доруобуйа харыстабылын миниистирэ Елена Борисова иһитиннэрдэ.
Елена Борисова: ““Доруобуйа харыстабыла” национальнай бырайыак чэрчитинэн тыа сиригэр мэдэссиинэ үлэһиттэрин ыытыыга быйылгы үбүлээһин 132,3 мөл солк буолар. 79,5 мөл солк федеральнай оттон 53 мөл солк өрөспүүбүлүкэ бүддьүөтүттэн көрүллэр. Тыа сирин балыыһаларыгар 119 быраас уонна 27 фельдшер үлэлиэхтэрэ”.
Миниистир иһитиннэрбитинэн, тыа сиригэр үлэлии тиийбиттэргэ 1 мөл солк төлүөхтэрэ, оттон фельдшердарга — 500 тыһ солк. Ааспыт сылга 139 мэдэссиинэ үлэһитэ төлөбүрү ылбыт. Уопсайа 2012-2018 сылларга “Земский доктор” уонна “Земский фельдшер” федеральнай бырагырааммаларынан тыа сиригэр 700 тахса мэдэссиинэ үлэһитэ тиийбит.
