Сөрүүн, дохсун самыырдаах күннэр кэннилэриттэн сэргэстэһэ олорор Сунтаар уонна Мииринэй улуустарыгар итии куйаас сатыылаата.
Мииринэй оройуонун Светлэй бөһүөлэгин төрүттэммит үбүлүөйдээх ыһыаҕыгар ыалдьыттаабыттар, итии кэми баттаспакка, олус сөрүүн, эбиитин Бүлүү өрүс диэкиттэн тыаллаах күҥҥэ бырааһынньыктаатылар. Ол да буоллар, ыһыах энэргиэтиктэр бөһүөлэктэригэр үчүгэй тэрээһиннээхтик ааста. Ыһыаҕы Дьокуускайтан ыҥырыллыбыт "Туймаада" эр дьон ансаамбыла бэркэ диэн киэргэттэ.
Оттон ыаллыы сытар Сунтаар улууһугар күн-дьыл бүтэйдии курааран, халлаан мэндээрэн, аламай күн сылама күүһүрэн, Бордоҥ уонна Кутана нэһилиэктэрэ олус көхтөөх ыһыахтары ыстылар.
Күн төһө да итии буоллар, бу сэлиэнньэлэр уйгуларын ыһыахтарыгар ыраахтан-чугастан ыалдьыт бөҕө тоҕуоруста, дуоһуйа сынньанна.
Үрүҥ тунах ыһыахтары, бу кырдьаҕас нэһилиэктэр, былыргылыы үгэһинэн, алгыс сиэрин-туомун эндэппэккэ толорон, Үрүҥ Аар Тойонтон, Сырдык Айыылартан сүһүөхтэригэр хоҥкуйан туран көрдөһөн-ааттаһан, дириҥ ис хоһоонноох тыллары эттилэр. Арыынан, сылгы кылынан, саҥыйахтаах алаадьынан Аал Уот Иччитин күндүлээтилэр.
Итии да күн буоллар, алгыс дьиктилээхэй тыллара сатараан, түөн тыллары сэргэ, сөрүүн тыал илгийдэ. Көр-нар көҕүлүттэн тутулунна.
Хорчуоппалар үлэлээтилэр. Уохтаах, кыыгынас быырпах, эмис эт, үөлүллүбүт собо, саҥыйахтаах алаадьы, саахыматтаах баахыла, лэппиэскэ арааһа, дагда, күөрчэх тылбыытыгар тиийэ, араас хорчуоппаларга тардылыннылар.Кэнсиэр, үҥкүү-битии, оһуохай тиһигин быспакка салҕанан бардылар.
Ыһыах элбэх дьон тоҕуоруһуулаах көрүҥүнэн — быыппастыгас былчыҥнаахтар күрэстэрэ буолла.
Оттон кэрэ аҥаардар муода күрэһигэр саха талба таҥаһын көрдөрдүлэр. Кыайыылаахтарга успуонсардар туруорбут бириистэрэ да дьоһуннаахай буолан үөртэ. Сунтаар улууһугар Бордоҥҥо уонна Кутанаҕа бэртээхэй үрүҥ тунах ыһыахтары ыытаннар, дьон санаата биллэ көнньүөрдэ, норуот эбии эрчим, күүс-күдэх ылла.
Олоҥхо дойдута Сунтаарга бары нэһилиэктэргэ ыһыах салгыы ыытыллар:
Бэс ыйын 17 күнэ - Түбэй-Дьаархан.Бэс ыйын 18 күнэ - Бүлүүчээн, Күндэйэ.Бэс ыйын 19 күнэ - Түбэй.Бэс ыйын 20-21 күнэ - Сунтаар улууһун ыһыаҕа.Бэс ыйын 25 күнэ - Күүкэй, Кириэстээх.Бэс ыйын 26 күнэ - Толоон.Бэс ыйын 29 күнэ - Арыылаах, Куокуну, Кэмпэндээйи, Тэҥкэ, Хадан, Сиэйэ.
Станислав Алексеев. Мииринэй куората.
