Дьэ, чунуобунньуктар, дьокутааттар ойохторо, чугас аймахтара ыыра байа сатаан баран, аны сокуоннай саастарын ситэ илик оҕолоро хаһыытыыр харчыланар, үгүөрү үптэнэр буолбуттар.
stolica-s.su саайт “Открытые медиа” дааннайдарыгар сигэнэн суруйарынан, Чечня аҕа баһылыга Рамзан Кадыров 12 оҕото (онтон иккитэ иитиэх) сыл ахсын 10-нуу мөл. солк. “өлөрөллөр” эбит.
Ирек Богуславскай диэн “Биир ньыгыл Арассыыйа” баартыйаттан дьокутаат биир суос-соҕотох сокуоннай сааһын ситэ илик оҕото дьиэтээҕи бүддьүөтүгэр 25 мөл. солк. аҕалбыт! Бу дьокутаат «сильным работу, слабым заботу» диэн луоһуннааҕынан аатырбыттаах.
Москуба уобалаһын губернатора Андрей Воробьев 4 оҕолоох: 9,12,16 саастаах кыргыттардаах уонна 5 саастаах уоллаах. Биэстээх уола номнуо сылга 11,5 мөл. солк. дохуоттаах уонна 200 кв.м иэннээх кыбартыыралаах. Бу оҕо улааттаҕына аҕатын моонньугар олорбото чахчы.
Федерация Сэбиэтин вице-спикерэ Евгений Бушмин уола сылы быһа “үлэлээн” 1,5 мөл. солк. өлөрбүт. Смоленскай уобалас борокуруора Евгений Полонскай оҕото эмиэ итиччэ дохуоттаммыт.
Саха чуноубунньуктарын оҕолоро да онтон туора турбатахтар. СӨ борокуруорун солбуйааччы Айдар Иванов оҕото дьиэтээҕи дохуотугар 7 мөл. солк. аҕалбыт.
Хомойуох иһин, чунуобунньуктар оҕолоро бары “туруу үлэһит”, баай буолбатахтар. Холобур, үс оҕо аҕата, КПРФтан Госдума дьокутаата Александр Ющенко биир оҕото сылга 3 кэлтэгэй кэппиэйкэни өлөрбүт.
