Войти

Войти

Халаан уҕараабытыгар оһорунуу түбүгэ саҕаланна. Онон Саха сирин үрдүнэн хас биирдии тэрилтэ, биирдиилээн дьон ким төһөнү кыайарынан көмөнү оҥорон эрэллэр. Кыһалҕа биир күнүнэн быһаарыллыбат. Оннуну булууга, бааһы оһорунууга элбэх күн-дьыл, үп-харчы наада. Былыр-былыргыттан саха норуота ыарахан кэмҥэ биир сомоҕо буолан, бэйэ-бэйэтигэр көмөлөсүһэн баччаҕа диэри норуот буолан кэллэҕэ. Бу да иннинэ тахсыталаабыт түгэннэргэ саха норуота түмсүүлээҕин, биир санаалааҕын көрдөрбүтэ.

Мантан сиэттэрэн “Кыым” норуот хаһыата көмө аахсыйатын биллэрбитэ. Ыҥырыыга дьон кыттыһан, Биисинэс киинин 7-с этээһигэр дьон күннэтэ кэлэр, көмөтүн туттарар, санаатын тириэрдэр.

 Ольга Петрова

Ольга ПЕТРОВА, биэнсийэлээх, Дьокуускай:

-- Уус Алдан Арыылааҕыттан төрүттээхпин. Оҕо тэрилтэтигэр үлэлээбитим, билигин сиэммин көрөн олоробун. Урукку да өттүгэр маннык аахсыйаларга кыттар этим. Онон бу да сырыыга туора турбакка сананным. Үөһэттэн ардахха, сылыйа илик халлаан анныгар туга да суох туран хаалыы диэн – иэдээн. Онон бэйэ бэйэҕэ көмөлөсүһүү хайаан да наада. Иэдээн атын дьоҥҥо кэлиэн эрэ сөбүн курдук санаабакка, маннык түбэлтэ кимиэхэ баҕарар кэлиэн сөбүн санаан туран, бука бары көмөҕө илиигитин уунаргытыгар ыҥырабын.

//Ольга Михайловна аҕалбыт сылаас таҥастара хайаан даҕаны хаһаайыннарын булуохтара.

Татьяна ЛЕГАНТЬЕВА, Былатыан Ойуунускай аатынан Саха тыйаатырын артыыһа:

Татьяна Легантьева

-- 2000 сыллаахха Ленскэй куорат бүтүннүү ууга барыытыгар аттыгар баар Чамча бөһүөлэгэ “баардаах” дьон көмөлөрүнэн арыыланан хаалбыта. Ол Чамча – мин төрөөбүт дойдум. Ууга барыы иэдээнин илэ көрбүт буоламмын, “Кыым” хаһыат ыҥырыытыгар тута кыттыстым. Тыйаатырбыт кэлэктиибэ бэс ыйыгар “Сааскы кэм” испэктээкили көрдөрүөхтээх. Ол үбүн халаантан эмсэҕэлээччилэргэ аныыбыт. Ону таһынан биир күннээх хамнаспытын биэрэртэн, оҕолорум кылаастарынан эмиэ үбү хомуйууттан туора турбатыбыт. Саха дьоно иэдээҥҥэ түмсэр, сомоҕолоһор үтүө өрүттээх. “Норуот күүһэ – көмүөл күүһэ” диэн мээнэҕэ эппэтэхтэрэ мантан да көстөр. Онон саха дьоно, биир киһи курдук түмсэн, халаан уутуттан эмсэҕэлээбит биир дойдулаахтарбытыгар кыахпытынан көмөлөһүөҕүҥ диэн ыҥырабын.

//Татьяна сылаас суорҕаны уонна сымнаҕас бэйэлээх соттордору Мэҥэ Хаҥалас Ороссолуодатын олохтооҕо, биэс оҕолоох ийэ Вера Аргуноваҕа аадырыстыыр. “Төрөппүттэрим ити нэһилиэккэ хортуоскаҕа үлэлии сылдьан билсибиттэр” диэн кини этэр.

Анастасия ГОТОВЦЕВА, СӨ үтүөлээх артыыһа:

Анастасия Готовцева

 

-- Оҕо сааһым ааспыт, ырыа-тойук эйгэтигэр тумсубун укпут, өрүү ахтар-саныыр Уус Алданым дьоно-сэргэтэ халаантан эмсэҕэлээн, чэпчэкитэ суох кэмнэри атаарар. Онон “Кыым” хаһыат аахсыйатыгар саарбаҕа суох кыттарга сананным. Киһи ыксаабыт кэмигэр кыра да көмө суолталаах буолааччы. Иэдээни кытта суос-соҕотох хаалбакка, аттыгар дьон баарын биллэххэ, көхсүҥ кэҥээччи, санааҥ сайҕанааччы. Онон бу тахсыбыт түбэлтэҕэ түбэспит дьон ханнык да түгэҥҥэ көмө баарын өйдүөхтэрин наада. Бу курдук элбэх буолан кыра-кыралаан көмөнү оҥордохпутуна, ыарыы да мүлүрүйүө, санаа да кэлиэ. Сахабыт сирин олохтоохторо, көмө аахсыйатыгар кыттыҥ. Норуот бүттүүн турунар дьыалатыттан туора турумаҥ!

//Анастасия оҕоҕо аналлаах көмөтүн биир дойдулаахтарыгар, Уус Алдан дьонугар аныыр.

Дмитрий АРТЕМЬЕВ, Арассыыйа үтүөлээх, Саха сирин норуодунай артыыһа:

Дмитрий Артемьев

 

-- Чернобыльга, Донецкайга, Чечняҕа дьон алдьархайтан айманан олорор кэмин илэ харахпынан көрбүт буоламмын, киһиэхэ кыра да көмө улахан суолталааҕын билэбин. Ленскэй куорат ууга барбыт кэмигэр балааккаҕа хоно сытан өрөмүөн үлэтигэр көмөлөспүппүт, кэнсиэр көрдөрбүппүт. Аҕыйах сыллааҕыта Чурапчы Одьулуунугар бииргэ төрөөбүт убайым дьиэтэ ууга былдьаммытыгар бүтүн аймаҕынан туруммуппут. Онон бу да сырыыга көмөттөн туора турбатым. Саха сирин дьоно-сэргэтэ, биир киһи курдук түмсэн, көмөтө оҥоруоҕуҥ! “Кыым” хаһыат ыытар аахсыйатыгар актыыбынайдык кыттыаҕыҥ!

//Дмитрий сыттыгы уонна суорҕаны Уус Майа Күп нэһилиэгин олохтооҕор, сэттэ оҕолоох Дмитрий Бойтуновка аадырыстаата. “Элбэх оҕолоох ыалга төрөөбүт буоламмын, бу ыал кыһалҕатын чугастык ылынным. Оҕолор этэҥҥэ улааттыннар, үөрэхтээх дьон буоллунар” диир.

“Сахаэтнофитнес” национальнай бырайыак салайааччыта Ирина ФЕДОРОВА аҕыйах сыллааҕыта төрөөбүт Одьулуунун нэһилиэгэ олоччу ууга барбытыгар Дьокуускайга аһымал кэнсиэрин тэрийбитэ. Маннык аахсыйаларга өрүү кыттар:

Ирина Федорова

 

-- Айылҕа киһи үөйбэтэх-ахтыбатах өттүттэн тургутуулары тосхойор. Маннык ыарахан кэмҥэ балаһыанньаттан бары тутуспутунан тахсыахпытын наада. Ыытар дьарыкпар араас саастаах кэрэ аҥаардар сылдьаллар. “Кыым” хаһыат ыҥырыытын истээт, биир күн дьарыкка кэлбит кыргыттар харчы хомуйан, бу аахсыйаҕа кыттан эрэбит. Сахам дьоно, доруобай буолуҥ. Халаантан эмсэҕэлээбит дьоҥҥо сайын устата араас көрүҥнээх көмөнү оҥоруоҕуҥ, бары бииргэ буолуоҕуҥ!

//Ирина бэйэтин көмөтүн Уус Маайа Эльдиканыгар олорор үс оҕолоох Кристина уонна Роман Радостевтарга аадырыстыыр.

Светлана КОЛЕСОВА — Сатабыл, эстэрээдэ ырыаһыта:

Сатабыл

 

— Мин Уус Майдаттан төрүттээхпин. Оҕо сылдьан олоро сылдьыбыт Уянди бөһүөлэгим куруутун ууга барара. Онон халаантан эмсэҕэлэнии иэдээнин бэйэбинэн билэбин. Улууһум дьоно сыллата бу кыһалҕаны кытта көрсөллөр. Бэс ыйын саҥата биһиги эҥээр кутталлаах быһыы-майгы хат кэлэр кутталланааччы. Онон сыл аайы иннэ-бүргэс үрдүгэр олоробут. Ол эрээри биһиги төрөөбүт дойдубутун ис сүрэхпититтэн таптыыбыт, атын дойдуга көһөр, уларытар туһунан санаабаппыт. Бу аахсыйаҕа бэйэм үтүө баҕабынан кыттарга сананным. “Тэбиэн саҕа хара санаатааҕар түөн саҕа үтүө санаа ордук”, “Отонноотоххо, оҥоойук туолар” дииллэринии, ыраас санаабытынан кыра да көмөбүт ким эрэ санаатын көтөҕүө, саҥа санааны саҕыа. Онон “Кыым” хаһыат аахсыйатыгар бука бары кыттыһыаҕыҥ!

//Сатабыл бэйэтин көмөтүн Амма Абаҕатыгар олорор элбэх оҕолоох Мотрена Прокопьеваҕа анаата.

Сахаайа, Александр Бурнашевтар, СӨ үтүөлээх артыыстара:

Сахая Александр Бурашевы

-- Биһиги дьиэ кэргэн сааскы халаан уутуттан эмсэҕэлээбит дьоҥҥо көмөлөһөр сыаллаах “Норуот күүһэ – көмүөл күүһэ!” аахсыйаҕа ыҥырыыны көрөн, үөрүүнү кытары сөбүлэһэн кытынныбыт. “Ойуурдаах куобах охтубат” диэн өбүгэлэрбит бэргэн этиилэрэ баар. Кырдьык даҕаны, сахалар былыр-былыргыттан туора киһи кыһалҕата диэн ойдон турбакка, биир сомоҕо буолан көмөлөһөр үтүө үгэстээхпит. Бу үгэс үйэлэр тухары салгыы салҕанан барыахтаах.

Күндү Сахабыт сирин олохтоохторун бу үтүө санаа аахсыйатыгар кыттыһан, бэйэҕит сэмэй кылааккытын киллэрсиҥ диэн ыҥырабыт!

//Бурнашевтар ичигэс таҥас, бородуукта нобуорун туттардылар.

Аахсыйа бастакы кыттыылаахтарын батыһан, саха аламаҕай, аһыныгас майгылаах дьоно, туох кыахтааххытынан үтүө дьылаҕа кыттыһаргытыгар ыҥырабыт. Күн киһитэ көмүскэс, айыы киһитэ аһыныгас!

 

__________________________________________

Ытыктабыллаах Саха сирин олохтоохторо! “Кыым” норуот хаһыата сааскы халаантан эмсэҕэлээбит кыһалҕалаах дьоҥҥо ким туох кыахтааҕынан көмөлөһөргүтүгэр ыҥырар!

Халаан уутуттан эмсэҕэлээбит дьоҥҥо саҥа, ыраас малы-салы, аһы-үөлү, таҥаһы-сабы хомуйууга эрэдээксийэҕэ анал пуун тэрийдибит. Көмөлөһүөн баҕалаахтары үлэ кэмигэр Дьокуускай куорат, Киров аатынан уулусса 18, блок В, 709 офиска күүтэбит. Сиһилии билсэр төл: 8-967-912-01-48, 8-914-227-28-43.

Ыксаллаах быһыыга – түмсүүлээх буолуоҕуҥ!

Тарҕат:

Комментарии

Защитный код Обновить