2024 сылга урукку Исидор Барахов аатынан сопхуос киин аппарата буолан турбут Нам нэһилиэгэр Исидор Барахов аатынан сопхуос ыһыаҕын тэрийиэхпит.
Маннык быһаарыныыны Нам, Ороһу, Балаҕаннаах нэһилиэгин баһылыктара Кардашевскай А.И., Антонов А.В., Дмитриев С.И. араас кэмнэргэ Исидор Барахов аатынан сопхуос Нам, Тамалакаан, Ороһу, Харбалаах, Балаҕаннаах отделениеларын управляющайдарынан, Исидор Барахов аатынан сопхуос кылаабынай зоотехнигынан үлэлээбит, сэбиэскэй-партийнай оскуоланы ааспыт, олох эдэр эрдэхпититтэн үлэлээн-хамсаан, Исидор Барахов аатын өрө тутан кэлбит, олох эргиирин-мускуурун билбит, ааспыт дьон урут сопхуос туһа диэн үлэлээбит-хамсаабыт баар дьоммутун чиэстээн, суох дьоммут ааттарын-суолларын ахтан-санаан, бэлиэтээн ааһарга анаан ылынныбыт. Улууспут баһылыга Валерий Валерьевич Николаев бу улахан тэрээһини өйүүрүгэр эрэлбит улахан.
Ыһыахпыт иннигэр дьоммутун-сэргэбитин мунньан, инники өттүгэр тыа хаһаайыстыбатын үлэтин-хамнаһын саҥалыы тыыннаан, сөргүтэн, быраҕылла сытар бааһыналары чөлүгэр түһэрэн, күөх маассаны ыһан, баар бааһынай хаһаайыстыбалары өйөөн, саҥа кооперативтары тэрийэн, ынах сүөһү, сылгы төбөтүн кыччаппат, эбэр туһугар үлэни-хамнаһы, тэрээһиннэри ыытыахпыт.
Исидор Барахов аатынан сопхуос баарына лугомелиоративнай этэрээттэр (ЛМО) диэн бааллара. Кинилэр сопхуос отделениеларын сирдэрин оҥорон, бурдук, күөх маасса ыһан хомуйан, элбэх үүнүүнү ылан, элбэх сиилэһи ынах сүөһү аһылыгар анаан угар этилэр.
Өрөспүүбүлүкэ үрдүнэн билиҥҥи туругунан элбэх бааһына сир быраҕылла сытарын билэбит. Бу үлэлэри сөргүтүүгэ Тыа хаһаайыстыбатын аһын-үөлүн министиэристибэтэ билигин баар ГБУ УПР "Мелиоводхоз" салайааччы Махаров Д.Д. улуустааҕы филиалларын сир үлэтигэр сыһыаран, тиэхиньикэнэн бөҕөртөтөн, улахан кыамталаах тыраахтырдары, прицепной тэриллэри ылан биэрэн, хааччыйан, үлэни-хамнаһы тэрийэн ыыттаҕына, аҕыйах сыл иһигэр элбэх бааһына сир туһаҕа тахсан, элбэх күөх маасса хомуллан, элбэх сыллаах от ыһыллан, хомуллан, ынах сүөһү, сылгы кормовой базата тупсуо этэ.
Үөһээ Бүлүү улууһугар ГБУ УПР "Мелиоводхоз" филиала, салайааччы Бырдакаров А.В. Саха Өрөспүүбүлүкэтин норуотун хаһаайыстыбатын үтүөлээх үлэһитэ, Улуус мунньаҕын депутата бу үлэни-хамнаһы үчүгэйдик тэрийэн ыытыа этэ. Маннык үлэлэр бардахтарына бааһыналарга ноһуом, удобрение киллэрии үлэлэрэ сөргүтүллүө этилэр.
Биир сүрүн боппуруоһунан үүт-эт соҕотуопкатын табыгастааҕынан көрөн тэрийии буолар. Бу боппуруоска анаан, Балаҕаннаахтан тыа хаһаайыстыбатын исписэлииһэ Одунча Чаҥый Эркин Уола уонна Балаҕаннаах "Сээс" тыа хаһаайыстыбатын потребительскай кооперациятын салайааччыта Кардашевскай Петр Владимирович Сунтаар улууһун Күндэйэ, Уһун Күөл нэһилиэктэрин "Сырдык аартык", "Блага" үүтү тутар-астыыр кооперативтар үлэлэрин-хамнастарын билэн-көрөн кэллилэр.
Билиҥҥи туругунан сүрүннээн, Балаҕаннаах нэһилиэгэр Петр Кардашевскай, Нам нэһилиэгэр "Уйгу" тыа хаһаайыстыбатын кооператива, Ороһу нэһилиэгэр Айсен Түүлээхэп, Тамалакаан нэһилиэгэр Алгыс Руфов, улуус киинигэр Семенова Анна Трофимовна "Булгунньахтаах" бааһынай хаһаайыстыбата уонна Нам нэһилиэгэр Петров Альберт Гаврильевич бааһынай хаһаайыстыбалара сүрүннээн үүтү-аһы оҥороллор.
Бу хаһаайыстыбалар Улуус дьаһалтатын, тыа хаһаайыстыбатын управлениетын өттүттэн улахан болҕомтоҕо ылыныллан өйөнүөхтээхтэр, кинилэргэ табыгастаах гына үүтү-аһы тутар тэрилтэ сүрүннэнэн тэриллиэхтээх.
Бу тэрилтэ сыала-соруга үрүҥ илгэни оҥорор дьоннор үүттэрин тутан астаан, туппут үүтүн иһин кэмигэр сөпкө төлөһөн, хаһаайыстыбалар салгыы сайдалларыгар тирэх буолар үлэни-хамнаһы ыытыахтаах. Бу маннык хайысхаларга үлэлэр бардахтарына тыа хаһаайыстыбатын үлэтэ-хамнаһа кэскиллээх-инникилээх буолуоҕа.
