Тохсунньу 20 күнүгэр Ил Дархан Айсен Николаев салалталаах Саха сирин дэлэгээссийэтэ, Новгороды фашистартан босхолооһун 75 сылын бэлиэтиир тэрээһиҥҥэ кытынна.
Манна байыаннай сулууспалаахтар параадтарын уонна байыаннай тиэхиньикэни көрдүлэр. Ону таһынан, “Албан аат үйэлээх уота” мемориалга уонна Новгороды босхолообут дьоруойдар пааматынньыктарыгар сибэкки дьөрбөтүн уурдулар.
Бу тэрээһин иннинэ Ил Дархан Старой Руссаҕа Хотугулуу-Илиҥҥи фронт түмэлигэр сырытта. Манна сэрии кэминээҕи сэдэх экспозициялар тураллар. Олортон ордук суолталааҕынан үс миэтэрэ уһуннаах, саха эпоһа уонна Ильмень күөлгэ кыргыһыы ойууламмыт мамонт аһыыта буолар. Бу – саха маастара Аким Бурцев оҥоһуга, 1970 сыллаахха Старорусскай оройуоҥҥа бэлэх быһыытынан кэлбит.
Ону таһынан, Буреги уонна Ильмень күөл кытылыгар турар Устреке дэриэбинэлэргэ саха буойуттарын пааматынньыгар сибэкки дьөрбөтүн уурдулар.
