Бүгүн, бэс ыйын 28 күнүгэр, Арассыыйа Суруналыыстарын Сойууһа тэрийэр үгэс буолбут Инфорум 2019 суруналыыстар үөрэнэр сугулааннара буолан ааста. Сугулааҥҥа дойду биллэр-көстөр суруналыыстара, эспиэрдэр кыттыыны ылаллар. Кинилэр Саха сирин суруналыыстарыгар баай уопуттарыттан үллэстэллэр.
Сугулаан пленарнай мунньаҕар Арассыыйа Суруналыыстарын Сойууһун бэрэссэдээтэлэ Владимир Соловьев кытынна. Кини бу улахан Сойууһу салайбыта иккис сылыгар барда. Владимир Геннадьевич РФ Бэрэсидьиэнин иһинэн гражданскай уопсастыбаны сайыннарыы уонна киһи быраабыгар сэбиэт чилиэнинэн буолар. Мунньахха зампред Кирилл Бычков, Саха сирин Суоуналыыстарын Сойууһун бэрэссэдээтэлэ Галина Бочкарева, “Якутск Вечерний” хаһыат кылаабынай эрэдээктэрин солбуйааччы Виталий Обедин уонна “Ситим” медиабөлөх генеральнай дириэктэрэ, Ил Түмэн дьокутаата Мария Христофорова кытыннылар. Мунньаҕы РФ Суруналыыстарын Сойууһун сэкэрэтэрэ Юлия Загитова ыытта. Кинилэр Саха сиригэр СМИ уонна олохтоох былаас сыһыанын туһунан ырытыстылар уонна баар кыһалҕалары этиннилэр.
Кирилл Бычков кылгас иһитиннэриитигэр Саха сиригэр СМИлэри хайдах өйүүллэрин туһунан дакылааттаата. Мария Христофорова Саха сиригэр суруналыыс ыстаатыһын сайыннарыы итиэннэ ханнык кыһалҕалар баалларын бэлиэтэтэ:
“Саха сиригэр былаас суруналыыстары кытары сыһыана үчүгэй, ол эрээри толоруу хаачыстыбата орто баайыылаах чунуобунньуктар таһымнара намыһаҕыттан ырылхайдык көстөн кэлэр. Айсен Николаев өссө куорат мээринэн олорон суруналыыстары, эрэдээктэрдэри муһан аһаҕастык кэпсэтэр үтүө үгэһи саҕалаабыта. Кини социальнай ситимнэргэ уопсайынан дьону кытары алтыһыытыгар аһаҕас. Оттон суруналыыстар, дьокутааттар өрөспүүбүлүкэ салайааччыларыгар ыйытыы ыыттахтарына, онно орто баайыылаах чунуобунньук хоруйун бэлэмниир. Оттон ол эппиэттэрэ олус тутах буолар, ити сорох минисиэристибэлэр уонна биэдэмэстибэлэр таһымнара олус намыһаҕын көрдөрөр”, - диэтэ.
Маны таһынан, Мария Христофорова “Арассыыйа Почтата” бэчээттэнэр СМИни кытары үлэлэһиитэ олус мөлтөҕүн, ону туоратарга күттүөннээх үлэни ыыппатарын эттэ. Маны таһынан, айар сойуустары, чуолаан Саха сирин Суруналыыстарын Сойууһун үбүлээһин, өйөөһүн суоҕун да кэриэтэ диэтэ. Саха сиригэр суруналыыс хамнаһа олус кыратын, суруналыыстары социальнай суолталаах идэлээх дьон курдук көрөр уолдьаспытын тоһоҕолоото.
Мария Николаевна этиитин кытары Галина Бочкарева толору сөбүлэһэрин биллэрдэ:
“Суруналыыстар орто хамнастара – 28-32 тыһ. солк. Бу хамнаска Саха сиригэр хайдах да олорбоккун. Оннооҕор улуус балыыһатын алын үлэһиттэрэ суруналыыстардааҕар элбэх хамнаһы аахсаллар. Оттон суруналыыс уопсастыбаҕа ылар балаһыанньата сүрдээх киэҥ. Онон суруналыыс идэтэ сөптөөхтүк уонна сиэрдээхтик биһирэниэхтээх. Айар сойуустарга көрүллэр граннары тыырыы сөбө суохтук ыытыллар” диэтэ.
Сугулаан чэрчитинэн Саха сирин суруналыыстарыгар олус наадалаах маастар-кылаастар ыытылыннылар, көрсүһүүлэр күн устата тиһигин быспакка ыытылыннылар.
Андрей Сорокин хаартыската, ЯСИА
