Кистээбэккэ эттэххэ Бүлүү улууһун күннэрэ Мииринэйгэ ыытыллыахтарыгар диэри, олохтоохтор эмис эти, үүтү-сүөгэйи, чохоону дьөрү амсайбакка сүрдээҕин хараарҕаан, соҥуоран олорбуппут.
Ону Бүлүү улууһун тыатын хаһаайыстыбатын кэпэрэтииптэрэ, бойом астаах-үөллээх кэлэн, дьэ харахпыт сырдаата. Хаһааҥҥа диэри Алтаай уобалаһыттан, Новосибирскайтан, Данияттан, Бразилияттан кэлэн сыҥаланар, сымсах, кумааҕы курдук этинэн үтэлэниэхпит биллибэт этэ. Бүлүүлэр дьорҕоот дьон, тэриллиллээхтик “Юбилейнай” ырыынагар эти-үүтү, суораты, чөчөгөйү, сүөгэйи, чохоону, бэл аатырбыт Лөкөчөөн сыырын, сордоҥу, тэҥэлини атыыга дэлэччи тартылар.
Дьон тоҕуоруһуута да дьоһун этэ. Уочарат ааттааҕа буолла. Тоҥонохтоһуу эрэ суох. Таһырдьатааҥҥы атыы эрээттэрэ эмиэ дэлэгэйдик атыыны тартылар. Сыаналара да бэрт удамыр буолан биэрдэ. Холобурдаан эттэххэ, биир киилэ сылгы этэ – 500 солк, ынах этэ – 500 солк. Биир киилэ сордоҥ – 250 солк.
Ордук таһаарыылаахтык “Сыа Бүлүү”, “Мастаах”, “Туйгун” хаһаайыстыбалар атыылаатылар. Дьэ, эмис эти эмсэхтэниэхпит, дьэдьэннээх чохоону уобалыахпыт да буоллаҕа. Итинэн сиэттэрэн, Бүлүү улууһун саламтатыгар, тыа хаһаайыстыбатын салаатыгар истиҥ махтал тылларын этэбин. Аны да кэлэ турар буолуҥ!
Станислав Алексеев, Мииринэй куората. Ааптар хаартыскалара.
