Быйыл Бүлүүтээҕи “Кэнчээри” сокуоннай саастарын ситэ илик оҕолор социальнай-реабилитационнай киин тэриллибитэ 20 сылын бэлиэтиир. Киин үлэһиттэрэ Улуу Кыайыы 75 сыллаах үбүлүөйүнэн, Аҕа дойду сэриитин кыттыылаахтарын, тыыл бэтэрээннэрин ытыктаан “Сэрии оҕо хараҕынан” диэн аахсыйаны саҕалаатылар.
Сэрии алдьархайын ордук оҕолор билбиттэрэ. Сорохтор төрөппүттэрин, олорор дьиэлэрин-уоттарын сүтэрэн эрэйи-муҥу көрбүттэрэ. Ол да буоллар, норуот хорсун быһыытын, дойдуга бэриниилээх буолууну умнубаттар. Биһиги сыалбыт-сорукпут диэн, кинилэр өйдөбүллэрин үүнэр көлүөнэҕэ хаалларыы, тиэрдии буолар.
Аахсыйа чэрчитинэн “сэрии оҕолорун” кытта көрсүһүүлэр ыытыллаллар. Бастакы матырыйааллар (ахтыылар, хаартыскалар уонна сэрии кэминээҕи суруктар) номнуо хомуллубуттар. Көрсүһүүлэр түмүктэринэн Улуу Кыайыы күнүгэр? “Сэрии оҕо хараҕынан” диэн ахтыы хомуурунньук тахсыахтаах.
