Дьокуускайдааҕы хаан тутар ыстаансыйа “Оставайся донором” диэн бүтүн Арассыыйатааҕы аахсыйаҕа кыттыыны ылбыт. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
“Муус устар 20-22 күннэригэр ыытыллыбыт марафоҥҥа 185 донор хаан туттарда. Олортон төлөбүрэ суох – 49, социальнай өйөбүллээх — 120. Тромбоцитка 16 киһи туттарда. Ол курдук, уопсайа 83 лиитэрэ хаан туттарылынна”, — диэн хаан тутар ыстаансыйа сүрүн бырааһын солбуйааччы Евгений Обутов иһитиннэрэр.
Кини этэринэн, өрөспүүбүлүкэҕэ 10 000 тахса донор баара биллэр. Онон хаан тиийбэт кыһалҕата диэн суох. Сылга 15 туонна донор хаана туттарыллар. Ол иһигэр 9 туонна – хаан тутар ыстаансыйаҕа. Дьокуускайга хаан тутар ыстаансыйаҕа уонна Мэдиссиинэ киинигэр туталлар. Ону таһынан, Нерюнгрига, Мииринэйгэ, Удачнайга, Ленскэйгэ, Алдаҥҥа, Үөһээ Бүлүүгэ уонна Мэҥэ-Хаҥаласка туталлар.
