Күн бүгүн Мииринэй куоракка хоруона вируһунан ыалдьыбыт биир киһи баар. Подмосковьеттан кэлбит эдэр киһи. Аҕатын эмиэ бэрэбиэркэлээбиттэрэ, хата анаалыһа үчүгэй. Ыарыһах Мииринэйдээҕи балыыһа инфекционнай салаатыгар сытан эмтэнэр.
Мииринэй оройуонугар түөрт обсерватор, биир провизор хоһо бааллар. Алмаастаах кыраай киинигэр биир обсерватор “Горняк” профилакторийга, иккис – наркология балыыһатыгар баар. Бу обсерватордарга 67 киһини эмчиттэр кэтээн көрөллөр. Билиҥҥи туругунан, Мииринэйдээҕи, Ньурбатааҕы ХБК-лар, МАТП, АЛРОСА-Авиа, МУАД, ЗЭС (“Якутскэнерго”) урукку тэтимнэринэн үлэлии олороллор. Дьыссааттар букатын да сабыллыбатахтара. Бородуукта маҕаһыыннара, ырыынак үлэлииллэр. Онон, тугу эмэ атыылаһыан баҕарар киһиэхэ, хааччах баарын көрбөтүм. Аптекалар ааннара аһаҕас. Интэриниэт нөҥүө атыылыыр маҕаһыыннар эмиэ үлэлииллэр. Ол эрэн, хонтуораларын иһигэр биирдии киһини уочаратынан киллэрэллэр. Мииринэй буостатыгар эмиэ оннук уочарат. Туох баар пиццериялар, гамбургер, фаст-фуд атыылааччылар, туох да сүрдээҕин үлэлии олороллор. Сорохтор дьиэҕэ диэри илдьэн биэрии өҥөтүн оҥороллор. Сорохтор миэстэтигэр аналлаах чуолҕанынан биэрэллэр. “Туймаада” ҮХАПК “Новай” ХЭТ бородууксуйатын төлөпүөнүнэн сакаастаатахха, бэйэлэрэ дьиэҕэр аҕалан биэрэллэр. “Алгыс” эрэстэрээн сахалыы ыһаарыламмыт собону ”Минутка” маҕаһыыҥҥа атыылыыр. Мииринэйтэн Чернышевскайга, Светлэйгэ уонна Арыылаахха айанныыр оптуобустар сырыылара кыччатылынна. Оттон Мииринэйгэ соҕурууттан сөмөлүөттэр кэлэ тураллар. Ол иһигэр ньиэп-гаас хампаанньаларын баахта үлэһиттэрэ.
Муус устар 22 күнүгэр Иркутскайтан “Таас Үрэхнефтегаздобыча” хампаанньа 44 оробуочайа кэлэн, аэропуорт балаһатыттан тута Таас-Үрэххэ барбыттара. Онтон атыҥҥа Дьокуускайга, Ленскэйгэ курдук улахан хааччахтааһын билиҥҥитэ суох. Дьон уулуссаларга толору. Маарылалаах, бэбээскилээх дьон ахсааннаах. Ол да буоллар, Саха сирин Ил Дарханын ыйааҕынан Мииринэй оройуонугар “мааскалаах эрэсиим” биллэриллибитэ. Онон, мааската суох сылдьар дьону полиция тутан ыстарааптыан сөп.
Станислав Алексеев, Мииринэй куората.
