Саха сиригэр суукка иһигэр 20 киһи хоруона вируһунан ыалдьыбыта бэлиэтэммит. Үс киһи үтүөрбүт. Бу туһунан СИА-ҕа өрөспүүбүлүкэтээҕи суһал ыстаап иһитиннэрэр.
Дьокуускай куоракка 20 киһи хоруона вируһунан ыалдьыбыта билиннэ. Олортон биэһэ – офтальмологическай балыыһаҕа. Ыалдьыбыт дьон инфекционнай балыыһаҕа киирэллэр, кинилэри кытта чугастык алтыспыт дьону быһаараллар, анаалыс ылаллар.
Бэҕэһээ Ленскэйгэ балыыһаттан биир киһи үтүөрэн тахсыбыт. Оттон Алдаҥҥа икки киһи үтүөрбүт. Уопсайа 43 киһи үтүөрбүт. Дьокуускайга үс киһи ыарахан туруктаахтар. Суукка иһигэр лабораторияларга 1732 тест оҥоһуллубут.
Өрөспүүбүлүкэ үрдүнэн уопсайа 331 киһи ыалдьыбыта бэлиэтэммит. Олортон 43 киһи үтүөрбүт, 4 киһи өлбүт. Обсерватордарга 667 киһи сытар.
