СӨ Судаарыстыбаннай Мунньаҕын
(Ил Түмэн) Бэрэссэдээтэлигэр
Гоголев П.В.
СӨ Тыатын хаһаайыстыбатын миниистиригэр
Атласов А.П.
Чурапчы нэһилиэгин кэтэх сүөһүнү көрөн олорор ыаллартыттан
ТУРУОРСУУ СУРУК
Убаастыбыллаах Петр Васильевич, Александр Павлович!
Биһиги 11 тыһ. нэһилиэнньэлээх Чурапчы нэһилиэгэр ханан даҕаны, ордук улуустар кииннэригэр буоларын курдук, кэтэх сүөһүлээх ыаллар аҕыйаан иһэбит. Ол курдук барыта нэһилиэкпитигэр 149 хаһаайыстыба сүөһү иитэр. Олортон 101 ыал 882 ынах сүөһүнү, ол иһигэр 292 ыанар ынаҕы, 31 тыһы тиҥэһэни кыстаттыбыт. 48 ыал аҥардас сылгынан дьарыктаналлар. 80-ча ыал сибиинньэ иитэллэр.
Итилэри этэн туран биһиги эһигиттэн биир суолу туруорсабыт.
– Эһиилгиттэн, 2021 сылтан кэтэх ыалларга ынах сүөһүлэригэр төбөтүгэр 35-тии тыһ.солкуобай биэрэн баран үүттэрин бэйэлэрэ батардыннар уонна тэриллиилээх хаһаайыстыбалар киилэ үүттэрин сыанатын 60 солкуобайга тириэрдэргэ диэн усулуобуйа киирэр диэн буолбут. Ону биһиги сөбө суоҕунан ааҕабыт. Тоҕо диэтэххэ, чааһынай ыал үүтэ атыттартан туох уратылааҕый? Киилэ үүт оҥоһуллар ороскуота билиҥҥи туттаран кэлбит сыанабыт ырааҕынан саппат. Онтон сиэттэрэн дьон сүөһүттэн тэйэн эрэр. Ол иһин биһиги чааһынайдарга ынах төбөтүнэн көмөнү оҥорууну тохтотон, киилэ үүт сыанатын 60 солкуобайга тириэрдэргитигэр уонна үүтү соҕотуопсуктар нөҥүө туттарыыны көҥүллүүргүтүгэр туруорсабыт.
Сүөһүнү биһиэхэ үксэ кырдьаҕастар биэнсийэбитигэр эбинээри уонна оҕолорбутугар, сиэттэрбитигэр көмөлөһөөрү ииттэбит.Үүтүнэн туттарыы биһиги усулуобуйабытыгар быдан барыстаах уонна бодьууһа кыра. Бастакытынан, биһиэхэ “Чурапчы” кэпэрэтиип үүтэ-аһа дэлэйдик атыыланар, онон чааһынай бэйэтэ оҥорон атыылыыра уустуктардаах. Иккиһинэн, үүтү туттарар кэммитигэр ый аайы харчыбыт кэлэ турара күннээҕи олохпут кыһалҕаларын быһаарарбытыгар ордук курдук.
Биһиги санаабытыгар оннооҕор улуус киинигэр чааһынай үүт атыыланара олус уустук диир буоллахпытына, нэһилиэктэрбитигэр баар кэтэх хаһаайыстыбалар үүттэрин батарыылара кыаллыбата буолуо.
Онон түмүккэ, чааһынай хаһаайыстыбалар өрөспүүбүлүкэ соҕотуопкаланар үүт аҥаарыттан ордугун туттаралларын учуоттаан, өссө төгүл эһигиттэн субсидияны ынах төбөтүгэр биэриини тохтотон, киилэ үүт сыанатын 60 солкуобайга оҥороргутугар туруорсабыт.
Бу туруорсууну харантыын буола турарынан бассаабынан билсэн, онно сөбүлэһэрбитин биллэрэн 72 кэтэх хаһаайыстыба аатыттан ыытабыт.
