Олор истэригэр куорат бөдөҥ кииннэрэ – “Якутский торговый дом”, Советская уулуссаҕа турар араас табаары атыылыыр тиһиктэрэ (комплекс) уо.д.а үлэлээбэттэр.
Хоруона вируһунан сибээстээн үөһээ ааттаммыт атыы-эргиэн кииннэрэ хаһан үлэлииллэрин, оройуоннааҕы суһал ыстаап быһаарыаҕа. Дойдуга, уонна Өрөспүүбүлүкэҕэ Сovid-19 дьаҥ биллэ намтыар диэри хааччахтааһыннар баар буолуохтара. Билиҥҥитэ балаһанньа тупса илик. Биллэн турар, маннык хааччахтааһын урбаанньыттарга улахан охсуулаах. Буолаары буолан, Мииринэй курдук кыра, атыы-эргиэн сэмэй куоратыгар. Урукку курдук түргэнник буһарыллар аһы “фаст-фуду”, пиццаны, шаурманы тарҕатар сулууспалар куһаҕана суохтук үлэлии олороллор. Сакаас элбэх, онон дохуоттарын сүтэрбэтилэр. Билигин Интэриниэтинэн онлайн уонна төлөпүөҥҥэ баар араас сыһыарыылар көмөлөрүнэн, ас тарҕатар сулууспалартан сакаастыахха сөп.
“Новай” ХЭТ сибиэһэй сымыыты, куурусса этин, Нерюнгри бойлерын, бакыаттаах үүтү, сүөгэйи, чөчөгөйү, Мииринэйдээҕи үүт собуотун бородууксуйатын – суоктары, утахтары ааҥҥа диэри аҕалан биэрэллэр. Мииринэйгэ 1000 тахса солк, Арыылаах сэлиэнньэтигэр 500 тахса солк суумаҕа бородууктаны атыылаһар буоллахха, тиэрдэн биэриитэ босхо буолар. Бу дьалхааннаах кэмҥэ өр сабыллыбыт тэрилтэлэр балаһыанньалара уустугурда. Холобур, көстүүнэйдэр, парикмахерскайдар, Интэриниэт өҥөлөрүн оҥорор тэрилтэлэр. Онон, балаһыанньа арыый да көнөрүн элбэх киһи күүтэр.
Станислав Алексеев. Мииринэй куората.
